Aizawl: Election Commission of India (ECI)-in Mizoram State Assembly inthlanpui neiha Lunglei district huam chhunga assembly constituency pathuma Expenditure Observer atana ruat Gaurav Awasthi, IRS., chu a chawlhtir.
Kumin MLA inthlanpuia Lunglei South, West Tuipui leh Thorang biala Expenditure Observer atana ECI-in a ruat, Awasthi hi a khawsak dan leh nungchangin a zir loh bakah ECI-in Observer code of ethics dan a duante a zawm loh avangin a chawlhtir nia sawi a ni.
Thudawn danin Awasthi hian political party hrang hrang Expenditure Agent leh Election Agent ten an thil tih reng rengah a lo hnawlsak nasain, a sawiselsak nasa a. Inthlan kaihhnawiha thil pawimawh tih tur hrang hrangte chu a bu ang ang diak diaka tih tum mah se, thil theih vek a nih lohna avangin candidate agent-te tan harsatna tam tak a thlen a ni.
Inthlan hi inrin hmaa puan thut a nihna laiah candidate agent mai ni lovin, inthlan buaipuitu tur official-te pawhin hnawhsaruma thil tih chang an nei tam avangin observer dangte pawhin hriatthiam chin tam tak an nei a. Mahse, Awasthi erawh a bu ang diak diaka tih a tum avangin harsatna a siam nasa a, hei vang hian political party hrang hrang agente te chuan inthurualin, District Election officer hnenah an lungawi loh thu an thlen a. Chumi kal zelah chuan Election Commission of India chuan Expenditure Observer a nihna atangin a chawlhtir ta nia thudawn a ni.