Italian rider Enea Bastianini chuan tun season a vawikhatna atan MotoGP intlansiakah hnehna a chang a. Malaysian Grand Prix-ah pakhatna a hauh.
Sepang International Circuit-ah kum 25 mi Italian rider hi Inrinni a sprint race a hnehna changtu Alex Marquez chuan um viau mahse a pel thei lova. Marquez hian pahnihna hauhin world championship a hmahruaitu Francesco Bagnaia chu pathumna a ni ve thung.
Bastianini hi kumin MotoGP-ah hnehna chang thei rider pasarihna a ni a. Hetihlai hian world championship a pahnihna Jorge Martin chuan Bagnaia nena an inkar a tih zim belh thei lova. Intlansiak pahnih la awmah point 14 in an inthlau.
Ducati rider Bastianini hi season tannaah a inhliam avangin September khan zai a ni a. Intlansiak engemaw zat a tel theih loh hnuah season tawp tha taka khar turin ngai a awh leh tawh niin a lang.