- Ruata
Maruti Suzuki Swift thar a chhuak dawn tih thawm a awm mek laiin Tokyo Motor Show, Japan-ah Suzuki chuan 2024 new generation model an phochhuak ta a, tuna chhuak nena khaikhinin danglamna hrang hrang a awm dawn.
Tokyo, Japan-a an phochhuah lai hian India ramah pawh Maruti Suzuki chuan an enchhin ve mek a, nakum kumtir lama tlangzarh theih turin ruahmanna an siam mek a ni. Tun tumah hian Tokyo Motor Show-a an phochhuah atanga tuna chhuak mek leh chhuan thar model lo awm tur a theih ang angin kan khaikhin ang a. Chutihrualin a chanchin kimchang leh dik zawk chu kan la hre chho zel dawn a ni.
- A khawl lam
He Swift thar tura chhinchhiah tlak tak leh danglamna liantham tak kan hmuh tur chu a khawl thar tur hi a ni a. 1.2L, 3-cylinder Z-Series petrol enginea hmang tawh dawn a, he khawl hian tuna chhuak mek 1.2L, 4-cylinder K-Series khawl chu a rawn thlak dawn a ni. He naturally aspirated khawl hi hybrid technology-a thawm a ni bawk a, a fuel efficiency 35kmpl pawh lai a ni dawn a, petrol a heh dawn lo hle a ni. Sum ti hek lo hawk tham khawpa petrol a heh dawn loh chu thuhran, he khawl, 3-cylinder powerplant hi Suzuki lightweight engineering (khawl zang zawk) lama hmalakna pawimawh leh tha tak a ni.
Hei bakah hian boruak chhe pekchhuah kawnga khuahkhirhna hrang hrang BS6 emission standards leh CAFÉ (Corporate Average Fuel Efficiency) Phase 2 norms mil thlap tur a ni a. Khawl fai leh zangkhai, chak tha tho si a ni dawn a ni. Hetihrual hian tuna chhuak meka a khawl ang hi India-ah chuan kan hmu zui dawn tih thawm te a awm tho bawk a, hei erawh a lo chhuah hunah a chiang mai dawn a ni.
- A chhunglam leh kentel hrang hrang
Tuna chhuak mek nena khaikhin chuan Swift thar lo chhuak tur hi a tuna chhuak mek nena khaikhin chuan changkang zawk fe tur leh kentel pawh ngah zawk fe tura beisei a ni a. A chhunglamah hian dual-tone Black and White interior theme kan hmu dawn a. A dashboard pawh hi design thar vek niin mit a la viau a ni. A AC vents leh climate control panel te pawh tuaithar niin design an thlak hret hret a. Maruti Swift thar turah hian tuna 7-inch infotainment system a hman mek chu 9-inch touchscreen information unit-a thlak a ni dawn bawk a. All-black semi-leather seats design mawi tak hian mit a la viau bawk a ni. Japanese variant hi ADAS (advanced driver assistance system) suite leh electronic parking brake te nei tura duan a ni a, India-a kan hmuh turah hian a awm dawn em tih a la chiang lo a ni.
- A lenzawng leh nghahchhan
Heartect platform ennawn leh tuaithar nghahchhana duan a ni dawn a, A dung, a vang leh a san zawng hi a indawt danin 3,860mm, 1,695mm, leh 1,500mm, a ni tawh dawn a. A dung hi 15mm in a thui hret ang a, a vang leh a san zawng hi a indawt danin 30mm leh 40mm in a zimin a hniam hret dawn thung a. A wheelbase chu tuna chhuak meka mi ang 2,540mm a la ni chhunzawm zel dawn a ni.
- A pawn lam design
Maruti Swift thar turah hian front grille design thar a hmang dawn a, hei bakah hian bumper design thar, LED projector headlamps LED DRLs design thar nei, leh fog lamp assembly leh bonnet design thar kan hmu dawn bawk a ni. Diamond-cut alloy wheel thar a nei bawk ang a, A hnunglamah pawh bumper design thar kan hmu ang a, LED taillight thar, C-shaped brake light awm tel kan hmu bawk a. A tlangpuiin lirthei dangah pawh generation thar model a nih hi chuan a design te pawh a danglam ve dawrh thin a, hetiang hi Swift tharah pawh hian kan hmuh hmel a, a mawi dawn viau a ni.
Hatchback kan hmuh tawhah chuan Swift tluka mawi leh hralh tam, kawng hrang hranga chei dawl leh Mizoramah ngei pawh car mawi leh changkang ve deuh lei ten an lei tam hi a vang viau ang a. A model chhuahna rei tawh zia leh daih rei zia en hian generation thar model tur pawh hi Mizoram mai bakah India ram pum ang pawha Swift model ti hlawhtlingtu a la nih zel hmel a. He Swift thar lei duhte tan hi chuan nakum lam la nghah ve deuh hret a ngai dawn a. A chanchin kimchang leh dik leh chiang zawk, India rama kan hmuh tur model chanchin kimchang pawh muangchangin kan la hre chho zel dawn a ni.