Kum hnih liam taa mak tak maia Kerala hmar lama mi 21 an bo ngawt hnuah tun hnai khan helai bawr vela cheng tho mi 10 chu an awmna chin hriat an ni lo leh a, ram chhuahsanin firfiak pawl, Islamic State an zawm ngei nia an hriat thu police-ten an sawi.
Police-te chuan an zingah hian hmeichhia 2 leh naupang 4 an tel tih an sawi a, United Arab Emirates paltlangin Afghanistan-a IS tamna an thleng tawh niin an hria.
Heng mite hi K Sajjid, a nupui Shaheena leh an fate pahnih. K Anwar, a nupui Afseela leh an fate pahnih leh an chhungkaw thian dang pahnih an ni a, an chin hriat an ni lo hlawm.
Heng mite hi an vaiin Kerala hmar lama Kannur district-a mite an ni a. Kannur deputy superintendent of police PP Sadanandan chuan tun anga an awmna chin hriat lohva a hlawma mi bo leh thin hi an chhui zui nasa hle tih a sawi a. An hriat theih chinah mi 100 vel chuan ram an chhuahsan tawh niin a sawi a. An chhuah chhan an hriat mai theih ngai loh thu a sawi bawk.
Tun tuma an chin hriat lohte hi an chhungte chuan November 20-ah an chhua ktih an sawi a, an thenawm lawka Mysuru pan tur angin an insawi an ti a. Bengaluru atangin Dubai an pan thu hre lehin a bak an hre zui tawh lo.
An chhungte thenkhat chuan Dubai an chhuahsan hma hian an bia a, ram thianghlim an pan dawn thu leh an kir tawh dawn loh thu an sawi niin an sawi a, mi dangte pawh zawm turin an sawm bawk.