Egypt thuneituten zangnadawmna an dawn hma loh chu tun hnaia Suez Canal-a tang, lawng kal vel dangtu, Ever Given lawnglian leh a hnathawk Indian mi 25-te chu chhuah zalen an tum lo.
Thla hmasa khan Suez Canal Authority-te chuan he lawng lianin bungrua phur lawng dangte a tihkhawtlai avangin US dollar tluklehdingawn khat vel dawn lai Egypt ramin zangnadawmna an ngiat thu a lo sawi tawh.
The Wall Street Journal tar lan danin Egypt hian Ever Given lawng hi a neituten zangnadawmna an pek hma loh chuan chhuah zalen bik an tum lo niin an sawi a. Suez Canal Authority chairperson Osama Rabie chuan, “Rang takin inremna kan neih theih ka beisei, zangnadawmna kan beisei zat an rawn tihlawhtling thei a nih chuan kan chhuah zalen nghal ang,” a ti.
An phut zat chiah erawh a sawi lang lo va, inbiakna an kalpui mek niin a sawi.
Lawng chhanchhuahna hna thawhna atan te, traffic a tihbuai avang leh he lui liana kal man kar khat chhung a tih khaihlak avangin an sum leh pai hloh zawng zawng chu US dollar tluklehdingawn khat dawn lai a nih mi thiamten an ring.
He lawnglian neitu company, Shoei Kisen Kaisha Limited thupuangtu erawh chuan an lawngin harsatna a siam chungchangah tute mahin zangnadawmna phutna emaw, khin tumna emaw an la dawn loh thu a puang thung.
Lawng hnathawk intelkhawmte chuan tuna lawng khalhtu leh hnathawk an hren mekte chu an ngaihven hle a, inremna a awm vat loh phei chuan hun rei tak chhung heng mite hi hren reng an ni ang tih an hlauhthawnpui hle.
He lawng hi Great Bitter Lake-ah tuikawng dal lo turah dah mek a ni a, chesuala kawng a dan chhan hi chhui chian mek a ni.
Ever Given lawng lian hi March 23 khan Suez Canal-ah a vang zawngin a tang a, March 29 tlai lam khan hnuhsawn a ni chauh.