Aizawl: Myanmar mipui sipai tangrual pawlten Khawmawi camp an lak hnua Myanmar sipai tlanchhuak, Mizorama a lutte chu nimin khan Hnahlan helipad atangin helicopter hmangin Myanmar-ah thawn kir an ni.
Tangrual sipaiten an hmun an luh chhuah avanga Mizorama tlan luta police kuta inpe ta hi an vaiin mi 43 an ni a, an zinga pakhat chu hliam a tawrh avangin Champhai District Hospital-ah dah a ni a, a bak mi 42-te chu Mizoram Police-in Ministry of Home Affairs thu angin Assam Rifles kutah a hlan a, nimin khan an ramah thawn kir an ni.
Champhai atanga thudawnnain a sawi danin Thawhtanni thim hlim khan Myanmar sipai mi 39 chu Zokhawtharah an inpe phawt a, nimin zing khar mi pali an inpek belh leh a, chung mite chu Hnahlan panpui an ni a. Chawhma 9:30 vel atang khan India chuan helicopter hmangin Myanmar sipaite hi Myanmar sorkar kutah a hlan kir a, helicopter hian tum li hruaiin chawhnu dar 1:00 vel khan Myanmar lamah phurh luh fel an ni.
Champhai atanga thudawn danin Khawmawi leh Riha inbeihna hi Chin National Army leh CDF Hualngoram huaihawt niin CDF Thantlang, CDF Zaniatram leh PDA tanghote chuan Myanmar sipaite hi an bei a, sipai camp an lak tak avang hian Tiau (Khawmawia) Myanmar national flag intar chu la thlain Chin national flag an tar a ni.
He inbeihnaah hian mipui sipai lam mi pakua an thi a, mi 20-in hliam an tuar bawk a, civil mi pakhatin nunna a chân a, pahnihin hliam an tuar bawk a; hliam tuarte hi Mizoram lamah enkawl an ni a, Myanmar sipai hliam tuar pakhat chu Champhai District Hospital-ah enkawl mek a ni bawk.
Khawmawi leh Riha inbeihna a thlen avang hian mi 5,000 vel Champhai district chhungah an lut tawh nia hriat a ni a, a tam ber chu Zokhawtharah awmin khawtlangin raltlante hi an buaipui a, ei leh in leh mutbu te, an riahna turte an ngaihtuahsak a, hall-ah a za telte an riak a ni.
Mipui sipaiin sipai camp pahnih an lak hnu hian Myanmar sipaiin jet fighter hmanga bomb vawi khat a thlak leh tih loh chu silai leh bomb ri hriat tur a awm rih lo a, nimin lamah erawh Myanmar sipaiin indo thlawhna leh helicpoter hmangin a bei leh dawn tih thawm a awm avangin Zokhawthar veng hnuai lama awmte chu hmun him lamah insawn turin khawtlang hruaitute chuan an hriattir a, chanchin buatsaih lai thlengin inbeihna erawh chu a thleng rih lo a ni.