Zirlai pawlin zirlaite scholarship 2nd installment pek chhuah vat phutin thuneitute an kar a, nimin khan zirlai eng emaw zat chu Mizoram Scholarship Board (MSB) office kawtah an pungkhawm a. Scholarship sum pe chhuak tur hian thuneitute lamin election commission an ngen mek.
MZP huaihawtin nimin khan zirlaite chu Dawrpui Vengthara MSB office kawtah an pungkhawm a, zirlaite chuan scholarship pe thuai tura thuneitute an ngenna leh an pek hma chu nawr zel an tum thute an auchhuahpui a, thuziak hrang hrang – ‘Scholarship chu a hun taka lak thin ni rawh se’ tih te, ‘Zirlaite chanpual scholarship pek ni rawh se’ tihte an keng bawk.
He huna thusawitu, MZP President H Lalthianghlima chuan lungawi lohna an lantirin awmzia a nei loh a nih chuan an thil phut a hlawhtlin hma chu kal thui an inhuam thu a sawi a, total bandh thlenga hmalak a ngai a nih pawhin an ti hreh dawn lo tih chu thuneituten hria se an duh thu a sawi a ni.
MZP thuchhuah siamin a tar lan danin sorkara thuneitute kar nana MSB kawta an punkhawm hnuah pawh an thil phut tihhlawhtlin a la nih loh avangin Nilainiah MSB office kawtah punkhawm leh an tum.
Hetihlai hian MSB Secretary Dr. PL. Ramliana chuan scholarship second installment pawisa an pek chhuah theih loh chhan chu Election Model Code of Conduct-in a phuar vang a nih thu a sawi a, tunah hian Election commission of India (ECI)-ah pawisa pek chhuah rem tihna an dil mek thu amah kawmtu The Zozam Times a hrilh.
Dr. PL. Ramliana chuan scholarship second installment an pek chhuah tur thu hi a thu phungin September 25, 2023 khan an dawng a, sum an dawn tak erawh October thlaah niin MLA inthlanpui neih hun puan chhunzawm a nih tak avangin MCC-in a lo phuar chhunzawm nen pawisa chu zirlaite hnenah sem theih a nih tak rih loh thu a sawi.
MSB secretary chuan scholarship chu zirlaite hnenah sem vat an duh avangin MSB-in phalna a dil a, hei hi Mizoram Chief Secretary Screening Committee pawhin a lo pawmpui tawh tih te, tunah hian Mizoram Chief Electoral Officer kaltlangin ECI hnenah dilna an thlen a, an ngaihchan mek thu a sawi a, ECI remtihna an hmu a nih chuan zirlaite account-a pawisa thun nghal tura an inbuatsaih fel tawh thu a sawi a ni.
Scholarship board-in ECI-ah phalna an lak ngai anga an sawi avangin MZP hruaitute pawhin nimin chawhnu vek khan Mizoram Joint Chief Electoral Officer (Joint CEO) hmuin zirlaite scholarship pekchhuah vat a tul thu a sawipui nghal a. Chief Election Commissioner of India hnenah pawh zirlaite scholarship pek chhuah phalna pe vat turin ngenna lehkha a thawn nghal.
MZP thuchhuahin a tar lan danin scholarship second installment pawisa la dawng lo hi zirlai 19,495 an awm a, an sum dawn tur hi Rs. nuai 1,787.48 a ni.