Boston Celtics in nidang anga an kut a hmui loh lai an nei chung pawhin hnehna an chang thei a, New York Knicks nen inkhelin 114-98 in an chak.
Thawhlehni zinga TD Garden-ah Celtics hian Knicks an mikhual a. Tum dang ang lo takin 3 points atang point score an harsat a, hei chauh ni lovin bucket awlsam ni thei tura ngaih atang luh loh an ngah.
Fourth quarter-ah erawh insiamtha in an ze ngai an chhuah a, a tawpa point an score hnem zar zovin an elpui hlun hi an hneh thei a ni.
Celtics tan star player Jayson Tatum chuan point 35 a score a, heng zinga 17 hi fourth quarter ah a score a ni. Celtics in 91-88 a hma an hruai hnuah chiang takin hnehna an chang zui.
Tatum hian 3 points luh a tum hmasak vawi 8 atang vawi khat chauh hlawhtling mahse inkhel tawp lamah a zawnin vawi li a lut a. Hei hi an dinhmun nasa taka siamtha tu a ni.
“Ball shoot kaltluan loh zan hi ka nei fo tawh a, hetiang hun tawng tur hian ka inkhel hnem ve tawh. Mahse point score tu tha ber berte chuan shooting a kal loh zan pawhin engkim thlak danglam turin vawi khat luh a boruak thlak danglam hi a awm thei tih an hria.”
“Inrintawkna a insiam chiahin engkim a inthlak danglam thei a ni.” tiin Tatum chuan a sawi.
Celtics tan hian Jaylen Brown chuan point 22 a score a, Kristaps Porzingis chuan point 21 a team hlui lakah a score bawk.
Coach Joe Mazzulla chuan, “Tun tum kan inkhel chu kan offense-ah 3 points leh layup ni lote thildang telh belh thei se ka belh ang. Tiang khawp chuan luh kan harsat a, tuipui anga zau pawn inhawng se kan lut hleithei lo a ni.” tiin inkhel tir lama an harsatna a sawi.
Inkhel dangah Milwaukee Bucks in Chiacgo Bulls chu 118-109 in an hneh ve thung a. Giannis Antetokounmpo leh Bobby Portis te an che tha.
Bucks tan Antetokounmpo chuan point 35 leh rebound 11 a la a, Portis chuan point 19 leh rebound 10 bench atangin a thawh.
Inhliam vanga match hnih khel lo Damian Lillard chu inkhel ve leh theiin ngai erawh a la awh lova, minute 32 chhungin point 12 a score a, assist erawh vawi nga a nei hman thung.