Tripura police-te chuan CPI(M) party state headquarter, Melarmath-a mi chu minister hlui, tuna MLA la ni mek, Badal Choudhury-a man tumin an luhchilha an dap.
Police-te hian headquarters bakah an state hmun hrang hranga an party office dangte pawh an dap a. Hetih lai hian an mi man tum, Badal Chowdury hi October 16 thleng district & session judge Satyajit Datta Purokayastha chuan a bail dilna a pawmsak a. Amah erawh hi chu khawiah nge a awm hriat a la ni lo zel thung.
Pathianni zan khan state sorkar chuan PWD minister thin, Badal Chowdhury leh a enkawl thin department-a Chief Engineer Sunil Bhowmik leh chief secretary thin, Yash Pal Singh lakah FIR a thehlut a. Police hian Chief Engineer Sunil Bhowmik hi Pathianni zan la la khan man nghalin West Agartala Police station-ah tantir a ni.
Thawhtanni khan court-ah hruai ni tawhin judicial custody-a awm tura tih a ni a, nimin khan court-ah hian hruai nawn leh a ni bawk.
Hetih lai hian CPI(M) chuan Thawhtanni tlai khan Agartala khawpuiah an MLA Badal Chowdhury laka sorkar chet dan duh lohvin lungawi lohna an lantir.