Leiverhna hmanraw tha bik (specialist drilling machine) chah thlen hmangin Uttarakhand-a leiverh chima tang mi 40-te chu ni li chuang hnuah lak chhuah theih ngei beiseina a thar mek.
Khawl dang hmanga hnawk tlate verh tlang tumna a hlawhchham hnuah a tha zawk hi Nilaini khan Delhi atangin phurh thlen a ni.
Khawl chak zawk hmang hian thawktu tang mekte an vah chhuah theihna tur pipe lian rawlh luhna tur verh theih beisei a ni.
Pathianni tuka hna an thawhna hmun leiverh chim avang hian thawktute hi an la tang mek.
Thuneitute chuan engtianga rei nge hnawk tlate then nan hun an mamawh dawn an sawi thei lo tih BBC an hrilh a; mahse, Ningani tlai atang khan khawl thar nen ‘a tha lama hmasawnna’ an nei ta tih an sawi.
Hetih lai hian Union Minister VK Singh chuan Ningani vek khan chhanchhuah hna hi ni hnih thum emaw vel tal an la thawh a ngaih tur thu a sawi thung.
Himalaya tlangdunga awm, Uttarakhand-a leiverh chim hi Pathianni zing dar 5:00 velah a ni a. Silkyara tunnel siam mekah a luhka atanga metre 200 vela thukah thawktute hi an tang a, lei tlate hian oxygen luh theihna tur pawh a dang vek a ni.
Anmahni erawh an him vek tih thuneitute chuan an sawi a. Chhanchhuah hna thawktute hian pipe hmangin chaw, tui leh oxygen an pe a, walkie-talkie hmangin an inbe thei bawk a. Hetih lai hian an zinga thenkhat hian lu na, anxiety leh luhai an nei tan nia sawi a ni.
Thuneitute erawh chuan hei hi an pha a, an zavaiin an la him dam vek niin an sawi.
Chhanchhuah hna thawhnaa hotu, Deepak Patil chuan an mamawh tawk oxygen pek luh reng a ni tih a sawi a, ‘thawk harsatna nei an awm lo’ niin BBC a hrilh a. Leiverh chhung chu tha taka tihen a ni a, rilrua hnualna nei pawh an awm lo niin a sawi.
Khawl thar chah luh hi a vang zawnga thil verh theih niin a augur (drill bit) nei niin bung thuma thenin sipai thlawhna hmanga phurh a ni a, lei minna hmunah hian remkhawm a ni.
Mi thiamte chuan he khawl hi darkar khata hnawl metre ngaa thuk verh hman niin an sawi.
Ruahman dan chuan pipe mm 900-a zau rawlh luhna tur a verh ang a, pipe chu rawlh lutin tangte chu an vak chhuak thei dawn a ni.
Ruahmanna hi siam ni mah se a hlawhtlinna hmun erawh a awlsam lo va. Hetiang tih tuma khawl an hman hmasak chuan hnawl tlate chu a verh tlang zo lo va, a verh chak lo hle bawk.
A lei a nem deuh avangin tlak belh a awm reng bawk a, then tawh saah a tla hnawk leh thin a. Thuneitute pawhin lei min belh awm zel chuan hna thawh tak tak a tihar niin an sawi.
Excavator hmang pawhin hnawl tlate hi then reng a ni bawk.