He tawngkam hi tunhma deuha nula hovin tlangval pawisa nei deuh, pawk deuh hlek an sawina thin kha a nia. Tlangval hausa deuh chuan nupui pawh an duh an thlang thei an tih fiamthuna thin kha a ni. Hmangaihna vang nilova, sum ngah vang liau liau a tlangval duhawm lo ni tate kha tlema nuihzat paha an sawi thinna tawngkam dik tak a ni a. Tun hnuah hian hei hi mipui pawh hian kan pawm ta viau mai.
Pawisa in ro a relna he khawvelah hian he tawngkam hi kan tidik chho tulh tulh a. Kan engkim mai hi sum hian min control ta vek mai niin a lang a. Kan kohhranah pawh sum thawh thei deuhte chu an tlatlum thuai a. Kan NGO ah pawh sum ngah lo tan roreltu nih a har tawh a. Sawrkarah leh lek phei chuan roreltu ni turin sum ngah lo tan mipui aiawh ni tura candidate nih phak a har tawh a. Miin ram hmangaihin ram siamthat hna thawh duh ngawih ngawihna thinlung nei mahsela, mipui aiawh ni tura thlan tlin tura campaign na tur sum a neih miau loh chuan a tan invawrhchhuahna kawng a ping ta. Rorel tura finna nei em em lo pawh nise sum an ngah chuan mifing thawkin an thaw a. Mipui lahin kan lo chho en ve mai bawk a. Sum ngah ngah hmeltha kha an ni satliah tawh lova, sum ngah ngah mifing te pawh ani chho ta zel mai. Kohhran lamah pawh sum ngah ngah ringtu tha leh rawngbawlnaa thawhhlawkah kan ngai chho ta zel a. Khawtlanga tlawmngai ni tura sum ngah nih a ngai ta tlat maite hian rilru a va ti hah thin em.
Kan Pathian hian mihring min tehna ber chu kan thinlung hi ani tih kristiante chuan kan hre vek a. Mahse vawiin nia kan rama mihring kan tehna hi chu sum ani ta tlat mai a. He tehna hi mizote hian kan thlak kir vat a va pawimawh tak em. Miin sum a ngah avangin a fing thut chuang lova. Sum ngah avanga dinhmun tha deuha a din pawhin amah kha a ngai reng a la ni a. A thu leh hla ngaihchan tur finna tak tak a awm thar thut chuang lo tihte hi pawm ngam a va tha em. He khawvela sum leh paia kan intlansIakna hian hnam ropui leh ram ropuiah min thlen dawn lova. Kan thinlunga thil tha duhna leh dikna hi kan van Pathian in a duh ber a ni reng a. Ringtu dik kan nih chuan chu chu kan innghahna ni sela. Chu chauh chuan kan ram, kan hnam din chhuahnaah min hruai thleng ang. Sum ngah ngah hmeltha hian ram hi an hruai bo thak thei a. Kan sakhuana pawh min hruai dal tulh tulh a. Kan NGO te pawh min la kharchhawn sak mai ang tih hi a hlauhawm ta.