MNF President Zoramthanga’n vote thlak fel vek tawh a nih avangin rin thu maia bial tina tling leh tling lo tur lo sawi rawtui vak vakin awmzia a nei lo tih a sawi.
He thu hi nimina MNF pisa hnam runa chhung inkhawm an neihah a sawi a, Zorama chuan party dangte anga rin thu sawi vak vak chu tul loh a tih thu sawiin, engkim titheitu Pathian hnenah erawh tawngtai chuan awmzia a neih thu a sawi.
MNF thuthlung chungchang sawi bawkin, ‘Nang malsawmna ni ang che’ tih chu an thuthlunga an hman mek a nih thu te, ram leh Lalpa thuthlung venghim turin hnam thuthlung an nei a, chu chu Mizoram chhunga chengte tan chauh ni lo, khawvel hmun hrang hranga Zohnahthlakte tan a nih thu leh malsawmna thuthlung an neih chu tuna an kalpui leh buaipui lai mek a nih thu a sawi.
MNF president chuan Myanmar, Bengladesh leh Manipur Zohnahthlakten Aizawl chu an Jerusalem leh an thlir ber a ni tih leh Mizoram chu a chhehvela politics kal velin an focus ber a nih thu a sawi a, tun hnaiah Manipur minister leh MLA-ten amah an hmuh thu sawiin, Naga lam be tura an ngen thu te, Naga chu MNF hnunga kal thin zawk an ni tih hrilhin, Manipur dinhmun dik tak chu India sorkar hnenah theihtawpa thlen reng a pawimawh thu a lo hrilh a, political advice tha tak pek an pawimawh hle thu a sawi bawk.
MNF party chhung inkhawm hi MNF Adviser Prof.F.Lalnunmawia, MLA-in a kaihruai a ni.