An rawlthar duhawm in goal ropui bik a khung zanah Manchester United in hnehna an chang a. Hrem tawk Everton lakah 3-0 in an chak.
Pathianni zana inkhel hi Everton in Premier League sum lam inkaihhruaina dan an bawhchhiat avanga point 10 paihsak an nih hnua inkhel hmasa ber a ni. Goodison Park-ah a nih avang leh an khingpui tur Manchester United hi beisei anga season hmang lo an nih mek avangin inkhelin ngaihven a hlawh zual.
Amaherawhchu thil danglam a thleng. Mikhual team in duhthusam a bul tanin minute thumna lekah Argentine rawlthar Garnacho-a’n Diogo Dalot ball cross chu laklawh awm miah lovin boruaka invawr kangin a bin lut a. Everton goalkeeper Jordan Pickford-a tan ban phak theih a ni lo.
- A la fuh vek lo
Bul an tan that avangin United an lawm. Mahse tun season inkhel dang ang thovin khelhdan nghet an neih loh a lang.
First half-ah goal hlauhawm dang an siam belh lova, Everton zawkin chance nei nualin Dominic Calvert-Lewin chuan huntha vawi engemaw zat a hloh.
Manager hrem tawk Erik ten Hag tel lova khel United tan rawlthar kum 18 mi Kobbie Mainoo a che tha, Dwight McNeil goal khung tur a dansak mai bakah United inkhel tinungtu awmchhun a ni fo.
Second half-ah United in Everton hriam loh chu an chhawr tangkai a, an huntha neihah Anthony Martial hmangin penalty an hmu a. Marcus Rashford chuan goal-ah a khung.
Huntawp hma in Martial bawkin United goal thumna a khung leh a. Hnehna an chan avangin paruknaah an inhlangkai.
Man Utd boss Erik ten Hag chuan inkhel zawhah, “Inkhel tan tir lamah khan kan zawi lutuk a, goal ropui kan khung hma avang khan awlsam viau turah kan ngai. Khatiang kha football-ah chuan tih thiang miah lo a ni. Minute 100 chhung khelmual chhungah kan inpe tur a ni a, second half-ah erawh kan ti tha viau.” tiin an inkhel chungchang a sawi.