- Ma Liana; Sihphir, Venghlun
Hlauh nachang hriat loh leh tanrual huna tanrual nachang hriat loh hi Mizo mipui hri vei, hnam ang pawha kan tuar phah fo thin hi a ni ve hrim hrim a. Vawiina ‘Sakhaw zalenna’ (Secularism) chungchångah pawh hian hetiang bawk kan nih loh nan hun tlém tê la awmah hian tan a túlzia ka rawn ziak ve leh hrâm a ni.
- India rama Sorkarna nei mek, BJP hian an chakna thurûk leh an mitmei ven ber chu RSS te, Bhajrang Dal te an nih hi an hre chiang khawp a. Term 2 an chelh chhung hian ram rorêlna an pêk chhan hi tih hlawhtlin an tum hlê loh chuan Mahatma Gandhi te ang bawk khan an nunna thlengin a tuar palh thei tih an hre ngei ang.
- Nakum, 2024, January thla hian Ram Temple, Aayodiya hmun chu an luah a, luah thianghlim’ (‘Consecrate’) an tum tih hi khawvel hriatin an puang dup dup tawh a ni. Hei hi an Inthlan thutiam (Poll promise) pakhat a ni.
- Kum 1970 chhoa India rama State thenkhata sakhaw tih bikna lo hluar avånga kan Constitution Preamble (tobul) hial tihdanglam ?ûla an hriat avânga 1976-a Congress Sorkar laia Preamble-a ‘Secular’ tih thumal an belh leh ‘Socialist’ tih thumal an belh chu paihbo hmakin September, 2023 Special Session (18-22 Sept.) an neih tum ni 21.9.23 khan kan Danpui Preamble atanga paihbovin a Copy kha kan MP zawng zawng an sem vek a nih kha.
- India ram hi Hindu ram ni tûrin State 28-a North East-a Christian State tih ngam, (1) Nagaland, (2) Mizoram leh (3) Meghalaya te chu Regional Party, an duh anga an thunun theih te nên North East Democratic Alliance (NEDA) hmanga BJP thu berna, National Democratic Alliance (NDA) zawm vek an ni. Mizoramah hlawhtling zo dawn lova an ngaih, an thawhpui MNF chu hlamchhiahin Regional Party dang, hlawhtling theia an beisei nên chuan an inrim mek tih pawh tlang hriat a ni. BJP Candidate te phei chuan an thawhpui te nên an Sorkar ngei an rin thu an sawi châmchi a nih hi.
- India ram hi Hindu Lalram ni turin Uniform Civil Code (UCC) pawimawhna hre pha chin vek kan ni. “Sunday-a Vote chhiar” tih te, Sunday hrim hrim bawhchhiattir leh kan Krismas ni ‘Good Governance Day-a hman tih te hi chu an tilui dawn ang tih rin ngam tur a ni. An hlawhtlin ka rin ve êm êm chhan chu 3.12.23 (Sunday) hian Party tin te hian Party Office kan hawn ka ring tlat mai zuk nia.