- Ruata
Renault Group (Renault & Dacia) lirthei lar Duster chu Europe lamah tihchhuah a ni ta a, India rama Renault Duster anga chhuak thin hmundanga Dacia Duster tharah hian design lamah pawh thil thar tam kan hmu a ni.
Duster hi India rama a tlangzarh hun tur sawi chian theih a la ni lo a. Europe khawmualpui lamah tihchhuah phawt niin he khawmualpuia lirthei lar sa leh lei hlawh tak lirthei a ni hrim hrim a. Khawl thar, design thar leh kentel hrang hrangah pawh thil thar tam tak kan hmu dawn a ni.
- Design leh siamphung
Renault Duster thar hi Renault-Nissan Alliance hnuaia duan CMF-B modular platform nghahchhana duan a ni a. Nissan pawhin he lirthei ang chiah hi anmahni brand hmingin khawvel hmun hrang hrangah an la tichhuak ve dawn bawk a ni. En thuak chuan a hmaa Duster kan hmuh thin nen a pian pawh a la inang viau a. Hetihrual hian a pawnlamah hian design thar hrang hrang kan hmu nual a, a hma aiin a lian tha bawk a ni.
Bigster concept zula duan niin design pawh a mawi viau mai a. Y-shaped LED daytime running light chu a headlight-ah kan hmu tel a. Grille design mawi tak a nei bawk a ni. A bumper leh fog lamp design-ah te thil thar kan hmu neuh neuh a. Y-shaped line LED daytime running light hi a hnunglamah pawh kan hmu bawk a ni. A tukverh design pawh hi a thar hlak niin a wheel arches, roof rails leh roof integrated spoiler te pawh design thar mawi tak nena duan a ni bawk.
Heng bakah hian thil thar hrang hrang a design lamah hian mawi tak tak kan hmu bawk a. A hnung bungraw dahna, luggage compartment pawh hi a hma aiin a zauin a sang zawk a, hmunawl 472-litres awm thei tura duan a ni a, hei hi a hmaa chhuak aiin a lian hret zawk a ni. Duster thar hi a dung 4,343mm long, a san zawng 1656mm, leh a wheelbase 2657mm te a ni.
- A chhung lam
CMF-B platform thar nghahchhana duan a nih avang hian he lirthei chhung hi a hmaa chhuak te aiin a zau tha zawk hle a. Digital instrument console, free-standing touchscreen infotainment unit tihte a variant sang hoah a awm bawk a. Automatic transmission selector lever thar neiin tunlaia an uar tak flat-bottomed steering wheel a nei dawn bawk a. A lighting system ang chiahin air con vent grille pawh hi Y-shaped design a ni dawn a ni. Y design door trim armrest-ah te kan hmu bawk a ni. A chhung hi a changkangin tunlaia thiamna sang ber ber hmanga thawm a ni.
- A khawl
Next gen Duster-ah hian tun dinhmunah chuan diesel engine a awm dawn lo a. 48V mild hybrid system neiin hei hian a tui a ti heh dawn lo hle a. Duster hybrid hian 140bhp pechhuak thei 1.6-litre 4-cylinder petrol khawl neiin hei hian electric motors pahnih (electric motor & high-voltage starter motor) a kengtel bawk a. Clutchless multi-mode automatic transmission neiin a khawl pangngai tan four speed leh a electric motor tan two speed te a ni dawn a, a technology hi a changkang dawn hle a ni.
He SUV tharah hian 130bhp power pechhuak thei 1.2-litre 3-cylinder turbocharged petrol engine with 48 volt starter motor pawh kan hmu dawn a. He SUV hi 4×2 leh 4×4 drivetrain tein tihchhuah a ni a, 6-speed gearbox a nei bawk a ni.
SUV tha tak mai India ramah pawh nasa taka lar hman chu a thar a lo chhuak leh ta a. Hetihrual hian Europe lam an vannei hmasa a, India ramah pawh an tlangzarh ve thuai beisei a ni.