Aizawl : Thawhlehni khan Kolasib District Magistrate John LT Sanga chuan Krismas leh kumthar vuakvet lo thleng tur denchhenin halpuah leh halmawi khapna thupek a chhuah.
Kolasib DM thupek chhuah chhanah, Krismas leh kumthar vuakvetah halpuah leh halmawi hal avangin boruak tha lo tam tak a insiam tih tar lan niin, “Ri bengchheng siamin, boruak chhe leng vel hian mipui zingah hri leng tha lo tak a thlen theih bakah, mihring hriselna a khawih pawi thei. Heti a nih avang hian Kolasib District mipuite hriselna venhim a nih theih nan leh Krismas leh kumthar him leh thlamuang taka mipuite’n an hman theih nan thupek chhuah a ni,” tih a ni.
Kolasib DM khapna thupek :
- Kolasib District huam chhungah Krismas leh kumthar vuakvetah halpuah, halmawi, sky lantern leh puak thei thil dang, boruak tha lo leh ri bengchheng siam thei chi reng reng lak luh, zawrh, hralh, hal leh hman khap tlat a ni.
- Naupang silai lem a mu kap chhuak thei chi reng reng lak luh, zawrh leh hman khap tlat a ni.
- He thupek zawm lote chu Section 188 of Indian Penal Code hmangin hrem theih an ni ang.
- He thupek hian puan a nih atanga thla hnih (2) chhung a huam ang.