Mizoram State Legislative Assembly 9-na Session hmasa ber chu nimin khan Assembly house ah tan a ni a, Protem Speaker Lalfamkima’n member thlan thar 39-te rinawmna thu tiamtirin a la lut a, Assembly spekaer atan Lalbiakzama thlan a ni.
Assembly session hi pro tem speaker Lalfamkima’n a kaihruai a, MLA atan thlan tharte lak luhna hun hman a ni a, rinawmna thu hi House Leader Lalduhoma’n a tiam hmasa ber a, hemi hnu ah member zawng zanwgin rinawmna thu tiam hi an la chhuzawm a ni.
Hemi hnuah Speaker tur thlanna neih chhunzawm a ni a, Sepaker chuh tur hian ZPM atangin Aizawl South II MLA Lalchhuanthanga’n Chalfilh bialtu MLA Lalbiakzama chu a nominate a, party dang atangin hming pe lut an awm lo a, chuhtu awm loin Lalbiakzama chu Speaker atan thlan a nih thu Protem speaker chuan a puang a ni. Hemi hnu hian Protem Speaker ngenna angin House Leader Lalduhoma leh Leader of opposition Pu Lalchhandama Ralte ten an thutna atangin Speaker Chair thleng an hruai a ni.
Speaker Chair-a a thut veleh thu sawiin Lalbiakzama chuan Mizoram Assembly chu house zahawm tak a nih theih nana vawn nun zel a tul thu te a sawi a, House Leader leh Opposition ledear te thusawi turin a sawm chhunzawm a ni.
Speaker ngen angin House Leader Lalduhoma chuan thu sawiin, House member nih chu zirlai exam tur ang deuh maia tan lak reng ngai a nih thu leh taimak leh thawhrim a pawimawh thute, member te chu ram tan theih tawp chhuah turin a sawm a, rulling leh opposition thliar lo in sorkar in bial tin ah khairual takin hmasawnna kawngah ke a pen dawn tih a sawi.
Duhoma chuan, sum inrenchemna kalpui a ngai dawn tih sawiin, house member ten an lo enjoy tawh thin eng eng emawte chu an enjoy tawh dawn lo a, hlawh pawh tinpun a ni dawn lo a, hruaitu an nih angin mipuite hma an hruai a ngai dawn tih a sawi a, bial hrang hranga department hnathawh inziahna copy chu MLA tinte pe vek thin a ni tawh dawn tih te a sawi a. House chhungah chief minister in fak siak vak vak te, engkim maia Chief minister zahawm tak tih tawngkawm te chu uar ve loh tur a nih thu a sawi a, house leader intlawhsiak ang maia infak vak vak te chu tul kan ti ve lo, a ti.
Leader of Opposition Lalchhandama Ralte, MNF MLA pawhin thu a sawi a, ZPM kaihhruai sorkar thar lo piang tak chu an lawm pui hl e, ram tana tha tur an tihah thlawp tlat an tum thute, ram leh hnam tana tha lo dawnah erawh house atangin na taka an dodal tur thute a sawi a, house zahawmna vawn him nan Speaker atan mi senior zawk te thlan thin a nih laiin tum tumah erawh dai hriat nei lo zawk thlan a ni, a ti a, Senior zawkte atangin he chair pawh tak luah tur hi house leader te hian an hmu zo lo tihna pawh a nih thei tih a sawi a, speaker chu an theih tawpa tawiawm an tum thu a sawi.
BJP Legislature party atangin Dr K Beichhua chuan thu sawi bawkin, sorkar thar chu beiseina sang tak nen an thlir a, duhsakna an hlan tih a sawi a, house zahawmna chu speaker lo ni tawh ten an vawng nung hle a, India ram state zingah pawh Mizoram Assembly house chu entawn tlak pawl leh a tha ber zing ami a ni a, heng te hu chhunzawm zel a nih a beisei tih a sawi.
Congress MLA C. Ngunlianchunga pawhin thu sawiin, MLA chawlh hahdamna hmun tur an buatsaihah a tan hmun bik siam sak a ni lo chu a vui thu a sawi a, a hrana room hran siam sak a nih loh chuan Common recess room ah a awm tur thu a sawi a. ZPM kaihhruai, enchhin tur sorkar lo piang chu fimkhur takin an kal a ngai dawn tih a sawi a, thil tha an tihah chuan an pui zel dawn a, an ti tha lo a nih chuan hmarcha te thak ang varin an thak dawn tih a sawi a ni.
Congress MLA in thu a sawi hnu hian ZPM legislature party leader K Sapdanga, ZPM member Lalrinpuii, Ginzalala, MNF member Lalrintluanga Sailo, Rasik Mohan Chakma leh Robert Romawia Royte ten thu an sawi a, Speaker hian session hi a ti tawp ta a, vawiinah session chhunzawm leh a ni anga, Governor Dr Hari Babu Kambhampati chuan thu a sawi ang.