Aizawl: Manipur-a tual chhung buaina chhuak avanga Meitei kut tuara Zo hnahthlak thi an ruang Imphal-a dahte chu nimin khan thlawhna hmangin Kangpokpi leh Lamka-ah te dah an ni.
Supreme Court a inrawlh tak hnuah Manipur buainaa tribal thite ruang hun rei tak, Jawaharlal Nehru Institute of Medical Sciences (JNIMS) leh Regional Institute of Medical Sciences (RIMS) dah tawhte chu nimin khan helicopter-in Motbung LS Ground, Kangpokpi district-ah leh Lamka-ah te dah an ni a, heng tribal martarte chawimawna atan hian an ruang lo thlen hian sumdawnna hmunte khar a ni a, Kangpokpi-ah hian ruang 19 dah niin Lamka-ah hian ruang 41 dah a ni.
Thudawn danin Committee on Tribal Unity (COTU) chuan Kangpokpi-a lak ruang 19-te hi Motbung bul, Phaijabng Village-ah vawiin hian vui a ni dawn a ni.
Lamka lama lak ruang 41-te vui hun tur erawh a la chiang lo a. COTU chuan an record-ah Kangpokpi atangin buainaa thi 45 an awm a; mahse, ruang 19 chauh an dawng a, a dang chu anmahni thattuten an paih boah an ngai a ni.