Argentine football legend Lionel Messi chuan khawvel football chawimawina sang a dawng a, The Best FIFA Football Awards-ah Best FIFA Men’s Player a dawng.
Inter Miami forward Messi hian he chawimawina dawng tur hian Manchester City striker Erling Haaland leh Paris St-Germain attacker Kylian Mbappe te a khum a. He chawimawin a hi vawi thum a zawnna niin a kum zawnin a dawng.
- Messi nge nge
Kum 36 mi Messi hian FIFA hnuaia Player of the Year chawimawina kalpui thin vawi riat a dawnna a ni a, ani aia dawng hnem an awm lo.
FIFA World Player of the Year tih a nih laiin tum khat a dawng a, FIFA Ballon d’Or tia vuah a nihlaiin vawi li dawngin kum 2016 atanga The Best FIFA Men’s Player tia vuah a nih hnuah vawi thum a dawng.
Kum 2023 khan Paris Saint-Germain tana la khelin bul a tan a, June thla khan Inter Miami lamah insawnin Major League Soccer lam a pan.
PSG in Ligue 1 title an chawina kawngah goal kua khungin Inter Miami a zawm hnuah Leagues Cup an lakna turah match sarih atang goal 10 a khung. Kum 2022 kumtawp a season laihawl a World Cup khelhah Argentina a champion pui a, hei hi nikum lama a buk ti rittu a ni tawh.
Tun tumah erawh pahnihna Erling Haaland nen an inthlauhna a sang lo. He chawimawina dawng tura thlannaah hian national team manager-te leh captain theuh bakah chanchinbumi thlan bikte leh FIFA website kaltlanga fans te vote chu lak a ni a. Heng belhkhawm atang hian Haaland nen hian an point hmuh a inang a, mahse national team captain ten pakhatnaah a hming an ziah hnem avangin a tling ta zawk a ni.
- A phu chiah em?
Chawimawina dawngtu puan a nih hnuah sawizui a tam a. Season liamta khan a khelhna club record ni tura goal 52 khung Erling Haaland chu dawng tura ngaitu an tam.
Norwegian striker hian goal khung lamah record a neih that bakah Manchester City chu Premier League, FA Cup leh UEFA Champions League te a lakpui vek a, mi tam tak ngaihah ani tluka phu an awm lo.
Fans thenkhatin Messi chuan PSG-ah beisei anga hun a hman loh mai bakah US lam a pan hnuin Cup lian ni lova che tha nghal mahse league season-ah a chetthat zui loh chu an sawi langsar tel.
- Bonmati a ‘bon’ chhunzawm
Hmeichhe chawimawina lamah nikum a Ballon d’Or Feminin leh UEFA Women’s Player of the Year dawngtu Spain leh Barcelona midfielder Aitana Bonmati bawkin chawimawina lian a dawng a. Colombia leh Real Madrid star Linda Caicedo leh Spain tana a khelhpui Jenni Hermoso te khumin The Best FIFA Women’s Player a thlan a ni.
Bonmati hian kum 2021 a Barcelona tana a khelhpui Alexia Putellas in season khat a chawimawina lian zawng zawng a hui vek chu tlukin tun season-ah player malkhai chawimawina a dawng vek.
- Chawimawina dang
Mipa coach tha chawimawinaah Manchester City manager Pep Guardiola chuan chawimawina a dawng a. Hmeichhe lamah England hmeichhe team World Cup final hruai thlengtu Dutch coach Sarina Wiegman chuan chawimawina a dawng.
Goalkeeper chawimawinaah Manchester City goalkeeper Ederson-a’n mipa chawimawina a dawng a. England leh Manchester United goalkeeper Mary Earps chuan a kum zawnin a dawng ve thung.