Aizawl: Rajya Sabha MP K Vanlalvena’n India leh Myanmar ramri depa inkalpawhna, Free Movement Regime (FMR) hlih tumna awm a duh loh thu sawiin, parliament session hmasa berah sawi chhuah ngei a tum thu a sawi.
Thawhlehni khan MZP chuan kumin atana an pisapui hawnna inkhawm nipahfawm a, ram leh hnam tana a thawh that avanga Mizoram MP K Vanlalvena lawmthu sawina inkhawm an buatsaih a. MZP Conference Hall-a inkhawmah K Vanlalvena chuan, MZP-in a hnathawh avanga lawmthu sawina an hlan chu lawmawm a tih thu a sawi.
K Vanlalvena chuan, “Tun hnaia Mizoram leh Chin State Zofate zalen taka inkalpawhna, Free Movement Regime (FMR) hlih tumna a awm chu ka pawm thei lo,” tiin, parliament session hmasa berah sawi chhuah ngei a tum thu a sawi.
British-in Zofate then darh a, pawi an tih em em laiin tun hnaiah inkalpawhna ber chu hung tum a ni leh ta tih sawiin Mizoram MP chuan, “India hian ramri hung a duh a nih chuan Mizoram leh Chin State inkar ni lo vin, China leh Pakistan ramri hung mai rawh se. A tawp thlengin kan dodal zel ang,” a ti.
MZP chuan Rajya Sabha MP K Vanlalvena chu Mizo hnam chhan nana India Parliament-ah vawi duai lo au chhuak a, ram leh hnam tana theihtawp chhuaha hma a lo lak tawhna avangin lawmthu sawina thuziak leh tawlh loh puan an hlan a. Network for Unity Association Mizoram leh Mizoram – Myanmar Coordination Committee te pawhin MP hnenah hian chawimawina thil pek an hlan bawk.