Africa Cup of Nations a champion tura rin hlawh ram Morocco in Nilaini zanah bul an tan a, Tanzania lakah 3-0 a chakin point thum an hmu nghal.
Group F a inkhel hi Stade Laurent Pokou-ah nghah a ni a. Morocco tan captain Romain Saiss chuan goal a khung hmasa.
Halftime hnuah World Cup a semi-final lut Morocco in goal hnih khung belhin Azzedine Ounahi leh Youssef En-Nesyri ten minute thum chhungin goal an khung ve ve.
Inkhel tan atangin Morocco an chungnung viau a, second half-ah minute 70-naah yellow card a hmuh nawn avanga Novatus Miroshi hnawhchhuah a nih hnuah Tanzania an bet lehzual.
Morocco hi Ivory Coast a khelh mek tournament-ah ranking nei sang ber an nih avang leh Qatar World Cup a an chetthat avangin rin an hlawh hle a. Tun tournament-ah Senegal nena match khat theuh an khelh hnua chak chiang ber an la ni.
Morocco coach Walid Regragui erawhin, “Khua a lum a, a uap bawk a, hei vang hian inkhelh a awlsam lo. Kan chak dan a lungawithlak a, dawhtheihna nen chiai miah lovin inkhel kan thunun. Player te an kheltha a, kan result ah ka lawm, bul tan chauh erawh kan ni.” tiin an chak hnuah hmabak a la thui thu a sawi.