Aizawl: Power & Electricity Department chuan January 28, 2024-a Lungdai Sentlanga an pisa tihchhiat a nih chungchanga thil awm dan an sawi fiah.
P&E department in nimina thuchhuaha an tar lan danin, January 14, 2024 khan Lungdai-a 2.5MVA, 33/11kV Transformer Sentlang Sub-station a awm chu eng chu pe chhuak thei siin, PHE tui pump-na khawl tan erawh chuan a hman theih loh a. Hei hi enfiah a nih hnuah HV-side Winding-ah tha lo a awm tih hriat a ni. A chhiat chhana pawh hi tui pump-na khawl starting current sang-in a shock avanga awm nia hriat a ni. Hetiang a ni chung hian eng pekna atan chuan hman a ni tho a, Sentlang Substation atanga power la te chuan eng chu an nei reng a, tui pawh hi Diesel Generator hmanga pump tho a ni.
Tui pump nan leh eng tha zawka Lungdai Sentlang-in an hmuh theih nan hian 3MVA 33/11kV transformer hmun danga hmanlai Sentlangah dah a ni a. Transformer hman lai sawn a nih hian Oil Filtration hi darkar 48 lai (ni hnih) tih a ngaih avangin, hman nghal mai theih a nih loh avangin January 27, 2024-ah khawtlang hruaitute leh department hotute chuan inhmukhawmin, Bukpui Substation atanga power la turin ruahmanna siam a ni a. Hemi Substation-in eng a pek khuate pawhin puih inhuamin hnatlang turin mipuite an hrilh a ni.
January 28, 2024 zing karah P&E Deptt duty ten Lungmuat leh N. Chaltlang inkarah ban pakhat sang deuhah a lo tliak tih an hmu leh si a, ban thar te phun a ngaih dawn avangin Pathianniah hi chuan êng inlak luh hman turah ngaih a nih loh avangin, hnatlanga mipui ti hah lo a thulh mai a tha tih a ni a. He hnatlang thulh thu hi khawtlang hruaitute pawh zing dar 9:15 hrilh hman an ni. Hnatlan tum tho Sentlang Sub-station atanga power la khua thenkhatte chuan hnatlang hi an thulh tho a ni.
Hun engemaw chen atang khan Sentlang Transformer bik hian PHE tui pump-na hi a zawh loh avangin, a start nan minute 20 chhung vel khaw chhung êng pekna hi shut down a ni thin a, hemi tihziaawm nan hian transformer hi dah belh a ni.
Sentlang Sub-station atanga eng hmu thin khuate chuan department-in ruahmanna a siam angin Kawnpui atangin January 28, 2024 chhun dar 1:30 khan power an nei thei ta a ni.
Power Transformer-ah rokhawlhna awm avanga mipuite eng pek theih loh chang a lo awm thin a. Kan transformer-te kum 20 aia rei service tawh 72% zet kan lo nei a. A hlui tawhte thlak nan sorkar chuan ruahmanna a siam mek a ni.
P&E Minister F. Rodingliana hova thutkhawm chuan, hetiang thil hi tun hnuah a thlen tawh lohna turin leh Power a intodelh theihnan solar hmanga power siam chhuak thei turin khawtlang hruaitu hrang hrang hnenah ram an lo dil tawh thin thu an sawi a. Hmun remchang awm thei ang angte lo ngaihtuahsak turin khawtlang hruaitute an ngen nghal bawk.