Chhum leivak zing nasa lutukin India khawpui, Delhi a tibuai chhunzawm mek a, thlawhna leh rel zin chhuak tur leh lut tur tam tak tihkhawtlai leh thulh a ni.
Thlawhna zin tur 50 leh rel 20 chuang an chhuah hun sawn tlaisak nia sawi a ni.
Flight tracking app, Flightradar 24 chuan thlawhna thlawk chhuak tur za tel fe chu chawhrualin an chhuah hun tur aia minute 25-a chhuah tlaitir niin minute riatin a lut turte tum hun pawh tihtlai a ni tih a tar lang.
Passenger tam takin tumhmuna rei tak tak nghahtir an ni thin avangin lungawi lohna an thlen nasa hle.
Nilaini bikah khan hmar lamah chuan rel 20 chuang an zin chhuah hun tihtlaisak an ni bawk.
Thawhtanni khan Delhi tumhmuna thuneitute chuan chuang turte tan thurawn tichhuakin an chuanna tur chungchangah airline bepawp turin an ngen.
“Delhi tumhmunah hian thlawh chhuak leh luh a theih reng a, CAT III bikah chuan harsatna a awm lo,” an ti a. CAT III tlankawng hi thlawhna khalhtute tan khaw hmuh that theih loh lai pawha tum theih tura duan bik a ni.
December-ah khan chhum leivak zing nasa leh khaw hmuh theih chin tawi lutuk avangin Delhi-ah thlawhna 100 chuang tihkhawtlai a lo ni tawh a. January-ah pawh a la ziaawm thei lo zel a, mi tam tak chu an thlawhna tihkhawtlai leh zin tur thulhtir an nih avangin social media-ah an vui nasa hle.
Nilaini tukah khan Delhi hmun hrang hrang leh dai velah chhum a zing phui tlat a, kawng a hmuh theih meuh lo va, in chhawng sangte pawh a lang thei mang lo va. Indian Meteorological Department (IMD) chuan veng thenkhatah phei chuan khaw hmuh theih chin hi ‘zero’ niin an sawi hial.
IMD hian Nilainiah khan ruah tlem leh thli na vak lo a tleh thei tih a sawi lawk a, chhum hi a la zing zui deuh dawn niin a sawi bawk.
Thlasik lai hian Delhi leh India hmar lama chhum leivak zing hi thil thar a ni lem lo va; mahse, kumina Delhi vawh dan erawh record thar a awm nual thung.
IMD chuan kumin January hi kum 13 chhunga a vawh ber tum a nih thu leh a lum lai ber pawh 17.7C chauh a nih thu a sawi a. Hemi dawta January a vawh leh ber chu kum 2015 kha niin hemi kum hian January-a a lum lai berin 17.9C a ni a. Kumin January hi zan lam pawh kum 2013 hnua Delhi a vawh leh ber tum a ni bawk.