Lok Sabha inthlanpui lo awm turah Tamil Nadu-ah AIADMK leh BJP chuan an thawkho dawn tih an tichiang ta a. Chennai-ah Union minister Piyush Goyal chu zinin AIADMK a dawr a, nimin khan thawhhona tur hi an tifel a ni.
Tamil Nadu deputy chief minister O.Panneerselvam leh Goyal te hian thawhhona an siam hnuah thuthar lakhawmtute an kawm dun a. “BJP hian Lok Sabha inthlanah bial 5 kan chuh ang,” tiin Goyal hian a sawi.
BJP hian AIADMK hi assembly bial 21-a bye-election neih hmabakah an pui dawn bawk a, “He state-ah hian EPS (E.Palaniswami leh OPS (O.Panneerselvam) kaihhruaina hnuaiah leh ram pumah NDA-a Narendra Modi kaihhruaina hnuaiah inremna kan siam a ni,” tiin Goyal hian a sawi.
Goyal hi BJP-a Tamil Nadu changtu (in-charge) a ni a, he state-a Lok Sabha-a bial 40 (Tamil Nadu-ah 39 leh Puducherry-ah pakhat)-ah hnehna an chang dawn tih a sawi a. He state-a party lian dang, DMDK-in NDA alliance an zawm dawn leh dawn loh chungchangah Goyal chuan an party boss Vijayakant a la hmuh dawn thu a sawi a ni.
Nimin vek khan AIADMK hian S.Ramadoss-a kaihhruai, Pattali Makkal Katchi (PMK) chu thawhpui turin hi inremna an siampui bawk a, PMK hian Lok Sabha inthlanah hian bial sarih an chuh ve dawn a ni.
Tamil Nadu deputy chief minister leh AIADMK-a coordinator ni bawk, Panneerselvam chuan, “Pattali Makkal Katchi (PMK) nen vawiinah inremna kan siam a, Lok Sabha election 2019-ah hian bial sarihah an chuh dawn a ni,” tiin a sawi.
PMK chief Ramadoss chuan AIADMK nena an thawh dunna tur chu a tha tawk a, Tamil Nadu tan pawha thil hlawk tak tur a nih thu a sawi a. “Mipuite tana hamthatna tur ngaihtuah tlattu turte,” tiin Panneerselvam leh AIADMK hruaitu dang, chief minister E.Palaniswami-a pawh a telnaa inremna an siamna hmunah a sawi a ni.
Other Backward Classes tamna, Vanniyar-a party lian tak, Pattali Makkal Katchi (PMK) hian Rajya Sabha-ah pawh bial khat an chang zui dawn bawk a ni.
Ramadoss hian AIADMK nena thawhhona tur an ziah hma hian an duh angte an hrilh hmasa tih a sawi a. An thu thehluh point 10 zingah hian caste-wise census neih te, Cauvery Delta region chu protected zone-a puan te, luia balu lak thin khuahkhirh te, Rajiv Gandhi thah thubuaia thiam loh chantir mi pasarihte chhuah zalentir te, NEET atanga awlte pawh a tel.
Panneerselvam-an a sawi dan chuan PMK hian Tamil Nadu assembly bial 21-a bye-election neih turah an chuh dawn lo va, AIADMK hi an thlawp dawn a ni.