Khawzawl District Cooperative Development Committee (DCDC) chu nimin khan Khawzawl Bawrhsap K. Lalrohlua hovin Khawzawl-ah an thukhawm a. DCDC mawhphurhna hrang hrang te bakah district chhunga Cooperative Society-te tihhmasawn leh tihchak zel dan tur te an sawiho.
He thutkhawmah hian Khawzawl District chhunga khaw pahnih – Rabung leh Tualte khuaah te Primary Agriculture Credit Society (PACS) changtlung taka kalpui mek a nih thu report a ni a. Biate, Kawlkulh, Chawngtlai, Tualpui leh Dulteah te pawh PACS chu din tuma hmalak mek a nih thu pawh report niin, PACS an indin fel hnuah Cooperative Society chungchang chu khawtlang huapa inzirtirna neih ni se, an ti.
PACS/ Farmer Service Society (FSS)/ Large Area Multipurpose Cooperative Society (LAMPS) ten hmunhma an mamawh a nih chuan, an dilna te lo ngaipawimawh turin Khawzawl Bawrhsap Office-in VC tin te hnenah ngenna siam se, an ti a. Cooperative Society anga hmasawnna ruhrel din mamawh an awm a nih chuan Bawrhsap pisa kaltlanga remchang dapsak ni se, an ti bawk.
Thutkhawmah hian DCDC thuneihna leh mawhphurhna hrang hrang te pawh an thlirho a. DCDC chu Cooperative Society (PACS, LAMPS, FSS) te hnena Fair Price Shop License pe thei tura thuneihna pek a nih angin, concern department (District Civil Supplies Office) in Pilot Project atan FPS License pek tur society pakhat lo ngaihtuah se, an ti a. Cooperative Society ten sawrkar laipui scheme haichhuah an duh chuan Detailed Project Report (DPR) siam kawngah DCDC-in a puih theih thu an sawi bawk a ni.