Aizawl : Mizoram Youth Commission Chairman Malsawmzuala Ralte leh OSD to CM Jonathan Lalremruata ten nimin khan Union Minister of State for Minority Affairs John Barla chu a chenna in, Delhi-ah an kawm.
MYC Chairman chuan Mizo thalaite tana MYC hmalakna hrang hrang hrilhin, a theih anga a portfolio atanga tanpuina dap pui turin a ngen a. John Barla chuan a Secretary, nen hmalak theihnate lo sawiho tura a rawn angin, an sawiho nghal.
PMJVK scheme kaltlanga hmalak theihna hrang hrang awmte kawhhmuhin, Chief Minister Lalduhoma leh District Council & Minority Affairs Minister C. Lalsawivunga te pawh biak nghal niin, 2nd instalment dawn tur leh project submit tawh nawr chhuak tura an rawn angin hma lak nghal a nih thu sawrkar thuchhuah chuan a tarlang.
Hemi chungchang Sawrkar thuchhuahin a tarlan danin PMJVK scheme guidelines chuan Mizoram pumpui a huam thei tawh dawn a. Health, sports, education, agricture, market etc. ah hmalakna hrang hrang, thalaite tana hmasawnna tur kawng tam tak a awm thei dawn niin a tarlang bawk.