MNF Treasurer K Vanlalauva’n central sorkar hmalakna azirin revolutionary party an inralrin a tul tih a sawi.
Thawhtannia Mizo Hnam Run chhung inkhawmah thu sawiin MNF Treasurer K Vanlalauva’n MNF chu revolutionary party an nih thu a sawi a. “Party chhung wing hrangah pawh national tih kan telh vek a ni. India-in ama thua min rin lut dodal ngam party kan ni a. Political party pariat-in an party nuaiboin min zawm tawh. Hnam movement kalpui anih laiin, ram leh hnam tan anih avangin kan phunnawi ngailo a. Amaherawhchu, kohhran hoten, in thiltih hi thalo kan tilo, in dosaka te hian kan tlin tawhlo e, an tih avangin inremna lam kan hawi ta a ni,” a ti.
Calcutta convention-ah India sorkar nen inremna lam hawiin inbiak a nih thu sawiin K Vanlalauva chuan, “Pu Laldenga’n, ‘Kan hnam martarte thisen avangin Mizote hi khawvel hriatah kan awm dawn ta’ a ti hial a ni,” tiin, remna leh muanna kawng an zawhna hautakzia leh kawng thuizia chu thangtharten an ngaihtuah let a tul hle tih a sawi.
MNF Treasurer chuan, hnam movement kalpui anih lai ata, remna hnuaiah pawh finance department-ah kum 20 dawnlai a lo awm ve tawh tih sawiin, “Tunah chuan midang ken ve ka tum tawh. MNF hi mipui court in thiamloh min chantir a. Sorkar thar hi a pawnga puia bei lo vin, mipuiin lo en zel sela, mipui court-ah thiam an chan leh chanloh a lo lang mai dawn a ni,” a ti bawk.