ZPM chuan nimin khan an party pisa-ah chhung inkhawm an nei a, thusawitu ZPM President Lalliansawta chuan party mipuite duhdan tihhlawhtlin a pawimawh rualin, ram mipuite thatna tur tihpuitlin a pawimawh ber zawk thu a sawi.
Sorkar hi party-in a siam tih sawiin ZPM President Lalliansawta chuan,” Party in kalphung leh tum a nei a. Chu kan duhna tipuitling tur chuan sorkar a lo piang ta a ni. Party leh sorkar hi a kal hrang thei lo,” tih sawiin, party mipuite duhdan tihhlawhtlin hi a pawimawh rualin, ram mipuite thatna tur tihpuitlin a pawimawh ber zawk thu a sawi.
Tuna ram hruaitu tura thlanchhuah chief minister leh minister rualte hmalak chinah mipui an lawm tia sawiin ZPM President hian, “Mipuite beisei tihlawhtling tur pawhin an rintlak dawn hle tih hi ram mipui tam ber hmuh dan a ni,” a ti.
India sorkarin Lalduhoma hi an ringtawk tih a chiang tawh tih sawiin, “Kan Minister rualte hmalak tum dan pawh an thlawp tih a lang. Kan party thupui – Ram rorelnaa Pathian ram tundin tih pawh hi Chief Minister kaihhruaina hnuaiah hian a hlawhtlin ngei ka ring tlat a, ram mipui beisei pawh a hlawhtlinna kan hmu chho tan mek zel a ni. Dik tak leh fel taka ro kan rel chuan kan lamah Pathian a tang zel dawn a ni,” Lalliansawta’n a ti bawk.