Aizawl: Saibual, Darchawi Presbytery, Tripura-a neih Evangelical Free Church of India (EFCI) Central Kristian Thalai Pawl Inkhawmpui lian, 19th General Conference chu February 18, 2024 zan khan a tiak.
February 15, 2024-a neih tan, he inkhawmpuiah hian India hmarchhak state hrang hrang atangin inkhawmpui chimtu, mi 2000 chuang an kal khawm a. Rorel palai mi 327 an awmin, state ang zawngah inkhawmpui palai kal tam berna thin Manipur state-ah KTP member tam zawk chu rambuai vangin an kal thei lo thung.
Kum hnih dana neih thin EFCI Central Kristian Thalai Pawl inkhawmpui lianah hian rorel palai te’n agenda chawpchhuahte atangin resolution 19 lak a ni a. Chung zingah EFCI KTP Logo pawmna; EFCI KTP Anthem pawmna; Hmarkhawlian (Cachar, Assam)-ah Ramthar rawngbawlna pualah building sak mek hming atan EFCI CKTP HOUSE vuah; Kum 2025 leh 2026 KTP Common Subject zirlaibu buatsaih tur pawmna leh Conference rorel palai intir dan siamthat te pawm a ni.
Kum 2023 census dungzuiin tunah hian KTP member mipa 6,368 leh hmeichhia 4,058, an vain 10,426 an awm mek a. Hlawmkhatah belhkhawmin EFCI KTP te’n missionary 48 an chawm mek bawk.
CKTP Inkhawmpui leh chu kum khat dan (Biennial)-ah neih turah thlak niin 20th General Conference-cum-Golden Jubilee lawmna chu kum 2026 hian NC Hills Presbytery, Assam-ah neih a ni ang.