Aizawl: Union Sports Minister Anurag Singh Thakur ruahman angin nimin tlai khan Mizoram Sports Minister Lalnghinglova Hmar chuan Assam Governor Gulab Chand Kataria a kawm.
Lalnghinglova Hmar hi Khelo India University Games hawnna Guwahati-a neih hmang turin nimin khan a kal a, hetah hian union sports ,inister ruahman angin India hmarchhaka sports minister hrang hrangte nen inkawmna hun an nei nghal a, hmarchhaka Sports hmasawnna tur an sawiho.
Hmarchhak sports minister-te an inkawm zawhah Thakur hian Assam larsap a hmuhnaa tel ve tura a sawm angin Mizoram sports minister hi a tel.
Union sports minister nen an inkawmnaah Lalnghinglova Hmar hian Mizoramin sports hmasawnna tura an mamawhte a thlen a, India hmarchhaka awm sum leh paia harsatna nei an nih avangin state budget pawn lama a theih anga pui turin a ngen a, union sports minister chuan a bawhzui tur thu a lo hrilh.
Union sports minister chuan Mizorama budget session tan ni-a Khelo India University Games ngai pawimawha a kal avangin Mizoram sports minister hnenah lawmthu a sawi.