Mizoram sorkar hnuaia a nghet lova thawk, provisional employee (PE)-ten an ngheh theihna tur scheme hman a nih theih nan sum leh paia inrenchemna (austerity measure) kalpui mek chu phelh turin Mizoram sorkar an phut a, chief minister chu an hnena thu a tiam hlen loah an puh.
Sorkar hnuaia department hrang hranga PE inzawmkhawmna, Provisional Employees Association of Mizoram (PEAM) hruaitute chuan nimin khan Aizawl Press Club-ah chanchinbumite an kawm a, austerity measure phelhsak tura sorkar an ngen thu leh an harsatna hrang hrangte an sawi.
PEAM President Lalhruaitluanga Sailo chuan PE-te chu an tana sorkarin regularization scheme a duan angin kum sarih an thawh tlin chuan an regular ve thei tih sawiin, “Sorkarin March 28, 2020-a austerity measure a kalpui atangin kum hnih chuang chuan kan regular-na tur scheme hi kan hmang thei tawh lo,” a ti.
Hemi avanga an harsatna tawhte sawiin, an thawhpui thenkhat scheme anga an ngheh hun tawhte chu austerity measure kalpui a nih avangin an nghet thei lo tih leh over age-a chhuah phahte an awm phah hial tih a sawi a; over age-a chhuakten eng hamthatna mah an dawn loh thu leh an thatlai tha duh tho sia an hamthatna tur ngaihtuahsak leh an ni si lo chu a beidawnthlak an tih thu a sawi.
Lalhruaitluanga Sailo chuan austerity measure-in PE nawlpuite a nghawng laiin hman tan, May 25, 2020 atanga December 31, 2021 chhung hian sorkar chuan mi 498-te a lo dah nghet leh reng si a, hetiang a nih avang hian austerity measure chu phelhsak thuai turin sorkar an ngen tih a sawi.
An harsatna tawh mek chungchangah hian Chief Minister Zoramthanga chu pisaah an kawm tawh thu leh hemi tum hian Mizoram puma PE awm zat chiang taka chhinchhiah a, Group C leh D-ah senior most pangate list siam tur leh chung mite chu dah ngheh dan kawng an zawn tur thu a lo hrilh tih PEAM president chuan a sawi.
Hetihlai hian PE list an siam fel hnuah erawh chief minister chu an hmuh leh thei ta lo tih sawiin, “CM hi hmuh kan tum thin a, appoinment min pe turin lehkha pawh kan theh lut a; mahse, phalna hi min pe thei lo. CM-in hmalak a tumna chu thla eng emaw zat a ral hnuah pawh a la hlawhtling ta lo a ni,” a ti.
PEAM hruaitute chuan Mizoram pumah PE 8,500 chuang an awm thu te, sorkar an thil ngiat hi a hlawhtling lo a nih chuan na zawka an thil duh tihhlawhtlin a nih theih nan kal an tum thute an sawi a, sorkar karna turin ruahmanna hrang hrang an siam tawh thu an sawi bawk.