Mizoram Legislative Assembly pakuana thutkhawm vawi hnihna, budget session hmasa ber chu nimin khan neih tan a ni a, March 13 thleng awh tur a ni.
Session hi chawhma dar 10:30-ah tanin, Mizoram Larsap Dr Kambhampati chuan thu a sawi a, a thusawi chungchanga lawmthu sawina motion chu Baryl Vanneihsangi’n house-ah a pu lut nghal a, motion hi February 21-ah sawihoa pawm tum a ni a, hemi ni hian session hnuhnung ber leh tun session inkara ram hruaitu hlui boralte sunna hun hman a ni dawn bawk.
Tun tum session-ah hian speaker leh dy speaker an remchan loh changa rorel inkhawm kaihruaitu tur, Panel of Chairman mi pali ruat an ni a, chungte chu Rasik Mohan Chakma, Lalrinsanga Ralte, K. Hrahmo leh Baryl Vanneihsangi te an ni.
Budget session hi vawiinah neih a ni dawn lo a, State Day a nih avangin assembly inkhawm chawlh a ni a, February 27 khian finance changtu, Chief Minister Lalduhoma chuan a vawi khatna atan tangka kum thara Mizoram sum hman tur (annual budget) a pharh ang.
Assembly inkhawm hi March 13 thleng awh tur a ni a, Inrinni leh Pathianni bakah sorkar chawlhah te rorel inkhawm neih a ni dawn lo a, a vaiin thutkhawm ni tura ruahman zat hi ni 16 a ni.