English Premier Lea-gue-ah 15-naa awm mek Crystal Palace chuan an manager thar atan Oliver Glasner an la lut. Tunhnaia che chhe tluang tak Palace hi an manager Roy Hodgson chuan thawhtan ni khan a hna a bansan. Hodgson chhuah hma atanga an lo dawr lawk tawh Oliver Glasner chu an manager thar atan an la lut zui nghal a, kum kum 2026 thleng cham turin contract an ziahpui.
Eagles manager thar Glasner hian German club Eintracht Frankfurt a lo enkawl tawh a, Frankfurt hnehna a chanpui zat hi 48.7% a ni a, a che chhe lutuk hran lova, kum 2022 khan Europa League-ah a champion pui hial a ni. Palace hian season tawp hunah an manager thar atan lak luh an lo tum sa tawh a. Veteran manager Roy Hodgson a chhuah leh tak si vangin an tum aia hmain an inruai a, inremna an nei thei ta hi a tu ve ve tan pawh thil tha lam a ni thung.
Glasner-a enkawl tur Crystal Palace hi EPL-a an khelh hnuhnung vawi 17-ah vawi 10 ngawt an tlawm a, table-ah 15-na an luah mek. Manager thar hnuaiah hmasawn ngei an tum ang.
Crystal Palace in manager thar an neih lai hian Italian club lian Napoli chuan an manager Walter Mazzarri banin, Fran-cesco Calzona an ruai thar ve bawk.
Champion lai Napoli hi season kal mekah an buai hle a, manager vawi hnih an ban der tawh. Tuna an ban tak Walter Mazzarri hi thla thum kal ta mai khan an manager thar atan an la lut a. Beisei anga hma an sawn theih loh vangin thla thum hnu lekah an inban zui ta mai thung. An manager thar Francesco Calzona hi Italian manager lar Maurizio Sarri leh Luciano Spalletti asst. manager niin Napoli-ah hian hun a lo hmang tawh a. Slovakia A enkawl hnuin Napoli manager nghet ni turin a club hlui lamah a kir ve leh ta a ni.