Tunlaia forward tha ber ang hiala ngaih, tlanchak, ball thiam, tawnhriat ngah leh hnuhma ropui hnutchhiah tawhtu Kylian Mbappe chuan khawvela football club ropui ber Real Madrid zawm a remti ta a. Season tawp hunah club hausa leh hlawhtling Real Madrid hi a pan ang.
PSG leh France goal thun khawl Mbappe hian season tawp rualin Ligue 1 champion PSG-a a contract a hmang zo dawn. PSG hian hlawh tam tak hlawh turin thlem mah se an hmin thei ta lo va, tunhnai khan club president Nasser Al-Khelaifi hnenah chhuah a duh thu leh Real Madrid zawm a duh thu a hrilh chiang ta nge nge. Chhuah a duh thu a sawi chian rual hian first 11-ah hmun a chang lo chawpchilh ve nghal a. Inrinni zana Nantes an hmachhawn tumin bench luah lumtir a ni. Bul tantir ni lo mah se inkhel tawp dawn hnaih lamah luhtir a ni a, penalty atangin goal a thunzui ta tho thung.
PSG hian French Ligue 1 season kal mekah point 14 zetin hma an hruai fal tawh a, champion turin an dinhmun a tha tawh hle. Point 14 zeta an san fal theih nan Mbapp hian a thawhhlawk hle a, an goal thun khawl a la ni reng. Campion chung ngeiin a ropuina PSG chhuahsan a tum a, Champions League-ah champion pui a tumruh viau bawk.
Ligue 1 club lian PSG tan Mbappe chhhuak tur hi channa nasa tak a ni ngei dawn. Mbappe hian PSG tan hian inelna hrang hrangah vawi 291 khelin, goal 244 zet a thun a, PSG tana goal thun hnem ber a ni mek. Goal 244 lai a thun tawh bakah hian assist vawi 93 zet a nei tawh bawk. PSG hi Ligue 1-ah vawi nga a champion pui tawh bawk. PSG atang hian khawvela football ropui bera ngaih Lionel Messi a lo inpuchhuak tawh a, Neymar chhuak tawh bawk. Messi leh Neymar awm loh hnuah Mbappe a awm lo ve leh dawn a, an kaw hawk dawn a ni ber mai.
World Cup 2018-ah France champion puitu Mbappe hian Real Madrid-ah contract a la ziak fel lo naa hlawh chungchangah inremna an nei fel tawh niin tarlan a ni. Real-ah hian season khatah 15m euros (£12.8m) a hlawh ang a, bonus neuh neuh nen kum nga chhungin 150m euro (£128m) a hlawhchhuak thei dawn a. Hei bakah hian image right atangin share a nei dawn bawk niin tarlan a ni.