Mizoram Upa Pawl Aizawl West III Area-in nimin khan Area Conference vawi 13-na, MPSOA Hall, CID Complex, Bungk- awn-ah an hmang a, bialtu MLA VL Zaithanzama’n a telpui.
Bialtu MLA chuan, “Ram changkang apiangah upa ten ngaihhlut leh ngaihpawimawh an hlawh tiin, thluak fim kan tih hun hi kum naupang lam ni lovin kum upat hunah a ni thin,” a ti.
VL Zaithanzama chuan, “Naupan laiin nu leh pa kan ngaisang thin a, kan han leikang a, nu leh pa ngaihhniamna leh sitna te a awm fo thin. Kum a a tam chhova, an hlutna kan hre tial tial zel a. Pa rawn nih tling tur chuan kum upat ve deuh a ngai thin a, Upa te hlutna pawh hrethiam tur chuan tawnhriat ngah ve phawt a ngai” a ti bawk.
“Upate atanga Mizo zia leh nunphung thate hriain kan chhawm nung zel a, Mizo sakhua leh nunphung, Mizo nihna tak hi Upate atanga kan rochun leh chhawmnun zel a ni. Ram rorelna leh inkaihhruaina kawngah pawh kan khaipa an ni lo thei lova, thangthar mit- hiam tak tak karah pawh Upa thu a fing thin an tih angin an kaihhruaina tel lovin ram a kal thei lo a ni,” a ti bawk a ni.
Aizawl West III Area MUP Conference hi hun hmasa VL Zuia, President-in a kaihruai a, hun hnihna Lalrintluanga Hnamte, Vice President chuan a kaihruai thung.