Aizawl: Kum 30 chuang MNF party president lo ni tawh, Zoramthanga’n tawngkaa party hruaitu atanga chawlh a duh tawh thu a sawi hnuah official takin hruaitu nihna atanga a chawlh theih thu party hotute hnenah a thlen a, Sr. Vice President Tawnluia pawhin a pu hnung zuia chawlh a duh thu a thlen bawk.
Thudawn danin Zoramthanga hian nimin zing khan an party election nomination secretary hnenah Tawnluia nen an chawlh theih thu hi a thlen a, an party thatna tur a nih chuan an chawlh theih thu leh an hotute ruahmanna eng pawh an zawm theih thu a sawi.
Nimin khan MNF Sr. Vice President Tawnluia an party President Zoramthanga hnenah hruaitu nihna atanga a chawlh theih thu hi a lo thlen tawh bawk a, an thu thlenah an tarlan dun danin, anmahni an zah avangin party thatna tura an ngaihtuahnate tibuai lo tur leh felfai tak leh innghirnghona awm lovin an ngaihtuhna te hmang theuh turin nomination committee member te an duh thu an sawi a ni.
MNF party hian March 15, 2024 khian an party hruaitu tur an thlang dawn a, Inrinni lo awm turah nomination committee hian official candidate tur an ruat fel dawn a ni.