Aizawl: Chief Minister Lalduhoma’n India leh Myanmar ramri hung (border fencing) leh ramri-a zalen taka inkalpawhna (free movement regime) hlih duh lohna punkhawm huaihawt lo turin ngen mah se, NGO Coordination Committee-in vawiin hian punkhawm huaihawt an tum.
NGOCC-in an ruahman lawk danin, Myanmar ramri hung leh FMR hlih duh lohna punkhawm chu vawiin chhun dar 1 hian Vana pa Hall kawtah huaihawt an tum a. Punkhawm hi MZP President H Lalthianghlima’n a kaihruai ang a. Hunserh hi Major K. Lalrinawma, Salvation Army in a hmang ang a, Prof. Malsawmliana, Secretary, NGOCC & Gen. Secretary, Central YMA-in report a pe ang a. Lalhmachhuana, Chairman, NGOCC & President, Central YMA-in thu a sawi ang a. Ngurmawii Sailo, President, MHIP Gen. Hqrs-in lawmthu sawiin hun a khar ang.
Hetih lai hian tun hnaia sorkar laipuiin India leh Myanmar ramri hung a tumna leh ramria zalen taka inkalpawh theihna a hlih duh lohna lantira punkhawm huaihawt an tum chungchangah Chief Minister Lalduhoma hian Inrinni khan a pisa-ah NGOCC hruaitute a sawipui a. An inkawmnaah chief minister chuan sorkar leh NGO te chu an thawh tlan zel a that thu a sawi a. Eng emaw duh lohna lantira punkhawmna leh thil tihah lim inhalsak hi chu awm lo hram se tha a tih thu leh kristiante tihah chuan a mawi chiah lova a ngaih thu a sawi a ni.