February 20, Thawhleh zan khan MSL 9 khelh chhunzawm a ni a, inkhel hmuhnawm takah Bungkawn LB Associates in hnehna an chang. Thawhleh zana inkhel dangah season thara chak harsat Venghlui VR4 chu Nursery Veng Sporting Club lakah an tlawm a, an che chhe tluang rih.
Thawhleh zana inkhel hmasa zawkah Nursery Veng Sporting Club leh Venghlui VR4 te an inhmachhawn a, chak phua inlan Nursery SC in an phu ang ngeiin hnehna an chang. Nursery SC hian VR4 lakah bul an tan tha a, quarter khatnaah point ngain an chungnung nghal. Quarter hnihnaah tha zual zawkin an inlan a, point 15 zetin an chungnung zui leh a, point 20 zeta hmahruai chungin chawlhlawk an hmang.
Chawlhlawk hnu lamah VR4 an khel tha hret a, quarter thumnaah point 13 zeta chungnunin, an khingpuite nen an inkar an tizau. VR4 in chak tuma tan an khawh laiin Nursery SC an khel tha chhunzawm a, quarter hnuhnung berah point khatin an chungnung zui leh a. Point 95-87 in hnehna an chang zui ta a ni.
VR4 lakah hnehna an chan theih nan Nursery SC tan Dequandre Duprii Dentmond a khel tha viau a, point 36 zet a thawkchhahawk. Hetihlai hian VR4 tana point thawkchhuak hnem ber Deandre Johnson chuan point 24 a thawkchhuak ve thung.
Thawhleh zana inkhel hnuhnung zawkah Bung-kawn LB Associates leh Mission Veng Hotshots ten inkhel hmuhnawm an lantir a. Inkhel inbuk tawk takah Bung-kawn LB A in point 89-78 in hnehna an chang.
Bungkawn LB A hian Hotshots lakah bul an tan tha viau a, quarter khatnaah point 13 zetin an chungnung nghal. Quarter hnihnaah point hnihin an chungnung zui leh a, point 15-a hmahruai chungin chawlhlawk an hmang.
Chawlhlawk hnu lam ah Hotshots in chak ngei tumin tan an khawh a, quarter thumnaah point thumin an chungnung a, an inkar an tizim. Quarter hnuhnung berah an innawr tawn fe hnuin Hotshots hi point hnihin an chungnung zui leh naa an khingpuite an lehthal zo ta chuang lo. Quarter li an khelh chhungin quarter hnih ve ve la bawk mah se Hotshots hian an bul tan chhiat an tuar a, tlawm zawkah an tang ta a ni.
Mission Veng Hotshots an hneh tum hian Bungkawn LB Associates tan Gregory Lee Heckstall chuan point 34 lai a thawkchhuak a, he inkhela point thawkchhuak hnem ber a ni nghe nghe. Hotshots tana point thawkchhuak hnem ber Christopher Michael Galbreath Jr chuan point 19 a thawkchhuak ve thung.
Zanin dar 5:30 atangin khelh chhunzawm a ni dawn a. Khatla TBL leh Nursery SC an intum ang a. Zan dar 8:00-ah Champhai BC leh Venghlui VR4 an intum ang.