Manager lar Thomas Tuchel chuan season tawp hunah Bayern Munich a chhuahsan dawn a. German champion Bayern Munich hian an manager thar atan Bayern Leverkusen manager Xabi Alonso an hmutai hle.
Manager lar, PSG leh Chelsea pawh lo enkawl tawhtu Thomas Tuchel hian March, 2023 khan Bayern Munich hi a enkawl tan a, Julian Nagelsmann hmunruak a luah. Bayern a enkawl tirh atangin pressure lian takin a delh nghal. A team hlui Borussia Dortmund lakah an trophy kawl mek a hloh teuh hle. Dordmund hian champion theihna hun tha tak an nei a, an khelh hnuhnung berah champion tura point khat chiah an mamawh laiin an tlawm ringawt a, uiawm takin a champion zo lo. Borussia Dortmund an chetsual vangin Bayern hi an champion hram a, Tuchel a nui theih phah.
Beiseina sang zawk nen season tharah Bayern hi an inlan a, Xabi Alonso hnuaia khel tha tak Bayer Leverkusen an ngam lova, hmahruaitu Leverkusen hi point 8 zetin an phak lo mek. Tunhnaiah an khelh tha lova, an khelh hnuhnung vawi thumah an tlawm zawn. Heti a nih vang hian manager Thomas Tuchel lakah rinhlelhna lian tak a awm a, ban a tawh rinna lian tak a awm nghal. Season tawp hmaa an inban tak thulhah tihin Bayern ngei pawh hian an manager lailawk tur an melh kual hman a, Ole Gunnar Solskjær pawh ngei pawh an hmutai hman hial a ni. Heti a nih lai hian season tawpa inthen turin inremna an nei fel leh ta zawk.
Bayern CEO Jan-Christian Dreesen chuan an manager chhuak tur Tuchel te lam nen inhrethiam tawn taka an indawr thu a sawi a. Kum 2024-25 season-ah coach thar nen intuaithar chu an tum ber a nih thu a sawi tel bawk.
Allianz Arena atanga inpuchhuak tur Thomas Tuchel chuan, “Season tawp hunah ka chhuak dawn a, he hmuna kan awm chhung chuan kei leh ka thawhpuite nen hlawhtlinna chan ngei tumin kan theihna sang ber kan hlan ang. A bikin champions League-ah Napoli laka kan hnufual hnuin hnehna chang let a, quarter-final luh ngei tumin kan insawr bing ang. Club nen kan inthen tur hi indawrna tha tak kan neih hnua kan inhriatthiam tawnna a ni e”, a ti ve bawk.
Tarlan tawh angin Bayern Munich chhuahsan tur Thomas Tuchel hian Borussia Dortmund, PSG leh Chelsea te a lo enkawl tawh a. Chelsea hi kum 2021 khan champions league-ah a champion pui. Manager tawnhriat ngah leh thluak fing tak mai a ni a, Bayern Munich ah erawh beisei angin hlawhtlinna sang a chang dawn ta lo thung.
Tuchel hian he thu buatsaih lai thleng hian PSG hi inelna hrang hrangah vawi 44 kaihruai tawh a, vawi 28 chakpuiin tlawm zawkah vawk 11 an tang a, draw vawi nga an nei bawk.