Aizawl : Mizoram University (MZU) hnuaia NSS-in nimina Yuva Samvad-India @2027 an buatsaih hmanpuitu MNF Vice President Vanlalzawma chuan, MZU lo pianchhuahna atan theihtawp a chhuah ve thu a sawi.
MZU Seminar Hall-a hun hmanah MP hlui ni bawk Vanlalzawma chuan, MZU lo pianchhuahna tura India leh MNF inremnaa ziah lan a nih angin, MP a nih lai khan theihtawp a chuah ve thu a sawi a. Parliament House a bill putluh a nihna turin Speaker leh MP dangte hnenah theihtawp chhuahin a ngen thu te, bill putluh a nih pawhin House-ah thu sawiin, a theihtawp a chhuah ve thu leh March 16, 2000-ah MZU dinna tur bill chu pass a nih tak thu a sawi.
Vanlalzawma hian MZU din tirh laia la pianglo leh, piang tir te chu tunah chuan zirlai niin, a taka MZU chhawrtu an nih tak mek thu sawiin, “Kan ram tana rohlu tak, MZU hmanga thiamna inchharchhuah hi, midang tan malsawmna ni tura pe chhuak turin vawiin hun hlu tak kan hman hmang hian kan bat a ni tih kan hriat thar a tul hle,” tiin, NSS thupui ‘Not Me, But You’ hmangin tlawmngaihna a taka Mizo thalaite’n an nunpui lehzual a tul thu a sawi bawk.
He hunah hian NSS National Awardee Dr. Zoramdinthara pawhin thu a sawi bawk.