Aizawl: Horticulture changtu minister, Prof Lalnilawma chuan sorkarin society kaltlanga sawhthing lei a tum thu house a hrilh.
Assembly Budget session neih mekah zawhna chhangin Prof Lalnilawma chuan sorkarin society kaltlangin sawhthing lei a tum thu sawiin, :Khaw tinah emaw, district hrang hrangah emaw, society dinna tawh phawtah society kaltlangin sorkarin lei a tum,” a ti.
Member-te zawh belhna chhangin horticulture minister chuan sorkar ruahmanna siam angin sawhthing hi tun dinhmuna lei a la nih loh thu leh sawhthing rate chu sorkarin Kg 1-ah Rs 50 aia hniam tur a ni lo tia a bituk thu leh a sang lam chu duhthusam a nih thu a sawi a. Society leh a leitu turte chu an indawr hnuah an inbiak remna rate ang anga kalpui tur a nih thu a sawi.
Sawhthing leina tur hi budget-ah pawh dah a ni dawn tih sawiin Prof Lalnilawma chuan, “Sawhthing leina tur, sorkarin a thar ang zah zah an hralh theihna tur, a tlawm berah Rs 50 rate anga an bituk a, budget-ah pawh dah tur a ni,” tiin house a hrilh.
Prof Lalnilawma chuan Mizoram hmun hrang hrangah society din tawh saah society dinhmunte zira rintlak leh rin theih an awm chuan sorkarin a rin nghal tur thu a sawi a. Society la din lohna khua leh district angah pawh a tul angin sorkarin hma a lak zel tur thu a sawi.
Khaw pakhat zelah society hi pakhat ding se tih chu duhthusam a nih thu sawiin minister chuan, “Duhthusamah chuan a buaipuitu turin thlai khat chauh ni lo, thlai hrang hrang buaipui thei tur society rin theih a ni a. A thlai khat tetea buaipui thei tur society din theih a nih pawhin sorkarin hma a la zel dawn a ni,” a ti bawk.