Land Resources, Soil & Water Conservation Minister Lalthansanga’n sorkarin RR Associates chu hmunphiah lei turin a biakpawh theih awmchhun an nih thu leh an hmalak dan a lo dik tawh loh avangin harsatna an tawk niin a sawi.
Nilainia Mizoram Assembly Budget Session neiha Leader of Opposition Lalchhandama Ralte zawhna chhangin Lalthansanga hian kumin hian hmunphiah leitu tur an awm mumal lo va, RR Associates hi hmunphiah lei tur hian an biakpawh theih awmchhun a nih thu a sawi.
Hmunphiah lei turin sorkarin RR Associates hi inremna a siampui hranpa lo tih sawiin Lalthansanga chuan, “Mizoram hmunphiah rate-te sorkarin a bituk aia hniam lova lei a phalsak mai a ni a. Chuvangin, RR Associates nen agreement pawh ni lovin, inhriatthiam tawnna angin kan insiam a ni,” tiin, an inremnaah pawh hmunphiah lei tur mi dang an lo kal pawhin an lei thei ang tih a nih thu house a hrilh.
Lalthansanga chuan sorkarin a theih ang angin, kum 2024 chhung atan bik hmunphiah ro leina tur rate chu, Grade A atan kg 1-ah Rs 100 aia hniam lo, Grade B-ah kg 1-ah Rs 80 aia hniam lo turin a bituk tih a sawi a. Hetih lai hian hmunphiah hring leina tur erawh a buk lo tih sawiin, “Hmunphiah hring hi tiro turin hun leh tha tam tak sen buai a ngaih avangin sorkar tan a hringa lei a remchang rih lo va. Chuvangin, a hringa hralhna rate a bituk ta lo,” a ti.
Soil & Conservation minister sorkarin hmunphiah lei dan tur ruahmanna a kalpui mek a. Market Study team-ten an zirchiang ang a, kumin 2024-2025 chhung hi inbuatsaih nan hman a, kum 2025-2026 hi chuan lei an tum angin, rate bitukin leh society pawh a nih anga kalpui an tum thu a sawi a. Hmun hrang hrangah hmunphiah leitu tur an en zel tih sawiin, tunah chuan a leitu tur pawh Tlabung lamah Taj Company an biak fel tawh thu te, Mamit district lamah gala Company an din tan tawh thu leh RR Associates hi chuan hmar tlangdung lamah an lei mek niin a sawi bawk.