Aizawl: Chief Minister Lalduhoma chuan a chenna bangla-ah amah hmu tura Inrinnia Delhi atanga kal, ONGC (Exploration) Director Sushma Rawat a kawm.
Rawat hian Meiduma gas an hmuhchhuah tawh chu a lakchhuahna tur hmun tha, hmun hnih hmun thumah an thlang fel tawh mah se, heng hmuna an khawlte lak luhna turin Chhimluangte luiah Mizoram sorkarin lei a dawh mek a, hnathawh a muan avangin an duh hunah hna an tan theih loh thu sawiin, lei dawh hi hmanhmawhsak turin a ngen.
Chief minister leh ONGC director hian Mizoram hmun thenkhata lei chhung atanga gas irh chhuak a awm thu an sawi dun a, heng gas irhchhuahnate hi a rang lama tlawh chhuah a, zirchianna neih thuai ni se, an ti.
Chief minister chuan Mizoram chhunga gas/oil irh chhuahna hria apiangten a awmna khua, lirthei kal theih chin atanga a hlat zawng, a thalak emaw video tawi leh thil tul dang awm te ama social media kaltlangin emaw, whatsapp number 8730970574-ah emaw email-ah cm@mizoram.gov.in-ah thawn turin mipuite a ngen a ni.
Rawat hian, Mizorama oil/gas lakchhuah hunah Mizo thalai geology lama thiamna neite tan hna a tam dawn thu chief minister hi a hrilh a. Chief minister chuan Mizo thalaite geology zirna lam lo uar tura ngenin a zirna hmun pawh a theih ang a tihlen dan sorkarin a ngaihtuah tur thu a sawi.
ONGC director hian Mizo thalaiten geology lam zirna an uar deuh deuh theih nan a tul anga Mizoram sorkar thawhpui an inhuam thu chief minister hi a hrilh bawk.