BJP hruaitu hlun, union home minister ni bawk, Amit Shah chuan Samajwadi Party (SP) chu na taka beiin Uttar Pradesh-ah chuan mi sual (mafia) chu tan inah leh SP-in inthlan chuh tura an tihte zingah chauh hmuh tur an awm niin a sawi.
Atrauli-a vantlang inkhawmah Shah chuan, “Uttar Pradesh-ah hian mafia i zawng a nih chuan hmun thumah chauh hmuh tur an awm. Tan in, Uttar Pradesh pawn leh Samajwadi Party-in inthlan chuh tura an tihte zingah chauh a ni,” a ti.
SP leh Bahujan Samaj Party (BSP) chu na taka bei kawpin, “Mi sualte hian Behenji (Mayawati) leh Pu Akhilesh (Yadav)-a sorkar hunah khan nasa takin Uttar Pradesh mipuite an sawisa a ni,” tiin BJP hruaitu chuan a sawi.
Chief Minister Yogi Adityanath-a kaihhruai state sorkar fakin Shah chuan, “Uttar Pradesh-ah hian mafia-ten police an hlau va. Pu Yogi Adityanath-a kaihhruaina hnuaiah chuan mafia zawng zawngin Uttar Pradesh an chhuahsan tawh a ni,” a ti.
Uttar Pradesh-ah hian thawh sarihin assembly inthlan an nei dawn a. A thawh hmasa ber hi February 10-a neih tur niin February 14, February 20,February 23, February 27, March 3 leh March 7-ah thawh dang parukin a chhunzawm ang.
Henga vote tlate hi an ruala inthlang ve dang state palia mite nen a rualin, March 10-ah an chhiar dawn a ni.
Uttar Pradesh-ah hian inthlan campaign vanglai a ni mek a, party leh an hruaitute chuan an elpuite chu na tak takin an bei a. Party eng emaw zat chuan bial hrang hranga an party hminga chuhtu turte pawh an puang tawh hlawm a ni.