Chief Minister Lalduhoma hovin Mizoram State Policy Coordination Committee chuan thlai thar pali thlan chhuah te lei dan tur chungchang an rel.
Ningania CMO-a thutkhawmah thlai thar lei khawmna tur Warehouse neih tawhsa chei that dan tur te, thlai chin tamna hmun a zira a thar sak belh leh warehouse behchhana processing unit din theih dan tur te sawi ho niin, scheme dang nena thawk dun (convergence) a Processing Plant kalpui theih te pawh tar lan a ni a, Warehouse te hi rang taka bawhzui nise an ti.
Thlai thlan bik palite kumina mipuiten an chin zat zirchianna kalpui mek leh thlai hrisel tak an chin theih nana department hmalakna te, loneitute hmanraw mamawh awm thei te pawh an sawi a. Crop Insurance lama hmalakna te pawh report a ni. Khaw tina thlai chingtu pawl (society) din dan chungchang sawi niin hemi thuah hian Cooperation Department lamin a rang lamin thuchhuah lo siam se an ti bawk.
Thutkhawmah hian Lalthansanga, Minister, PC Vanlalruata, Minister, Prof F. Lalnilawma, Minister of State, Dr. KC Lalmalsawmzauva, Adviser to Chief Minister leh Coordination Committee members dang te an tel a ni.