Ningani khan Excise & Narcotics Minister Lalnghinglova Hmar hovin Central YMA Office Bearers leh Excise & Narcotics Department chuan zu leh ruihhlo dona kawnga hmalak dun dan tur sawi hovin an thukhawm.
Thutkhawmah hian Excise minister Lalnghinglova Hmar chuan Mizoramin zu leh ruihhlo vangin a tawrh nasat tawhna te do let tur hian Excise & Narcotics Department leh Mizorama pawl lian ber, Central YMA chuan hma kan lak dun zel a pawimawh a; chutianga thawhhonaah chuan hmun hrang hrang atanga zu leh ruihhlo rawn lut tur dan thu-ah te, a dapchhuahna chungchangah te thawkho zelin, YMA bakah, sorkara department dang te, kohhran hruaitute pawh thawhpui zel an la nih tur thu a sawi.
Excise & Narcotics Department Commissioner Z. Lalhmangaiha pawhin tun hnaia Burma ram buai vanga ral tlante avangin Phunchang leh a chhehvela zu siamna a pun belh bakah, Aizawl hmun hrang hranga Hotel leh Restaurant thenkhata ualau taka zu chelek thin an awm nia sawi pawh enzui a nih tur thu a sawi a. Zu leh ruihhlo dona kawngah chuan Central YMA emaw pawl hrang hrang dangte chu Excise & Narcotics department-in a thawhpui zel theih thu a sawi bawk.
Thusawitu dang, Central YMA President Lalhmachhuana chuan zu leh ruihhlo hluar zel hi mipuiin ngaia an neih mai a hlauhawm thu sawiin, “Hetianga khawsate hian hlauh an neih a tul a. Chuvangin, zu leh ruihhlo laka fihlimna tur thu leh khuahkhirhna thu hi a tam thei ang ber mipuite hriatah puanzar a ngai a ni,” a ti.
Ruihhlo dona chungchanga inkawmkhawmnaah hian Peter Zohmingthanga, Joint Commissioner of Excise & Narcotics leh H. Lalrinpuia, Secretary Kumpuan Committee & CEC Member, CYMA chuan report an pe a, Lalramsanga Sailo, Secretary to Govt. of Mizoram, Excise & Narcotics chuan lawmthu a sawi.