Thawhleh zana inkhel ngaihven hlawh takah Manchester City hneh lova Tottenham Hotspurs an tlawm vangin Aston Villa chu champions league khel turin an tling chiang nghal. Villa hian a vawi khat nan champions league an khel dawn.
Manager tawnhriat ngah Unai Emery hnuaia hmasawn tak Aston Villa hian EPL season kal mekah vawi 37 khel tawhin point 68 an hmu mek. Hei hi EPL an khelh tawh zawng zawngah point an hmuh tam ber dawttu a ni hial a. EPL-ah point an hmuh tam ber tum chu 1992-93 season-ah point 74 an hmuh kha a ni. Season kal mekah beisei phak baka chetha Villa hi an hnuai chiaha awm Tottenham lakah point ngain an sang fal mek. Tottenham hian thawhleh zana an mikhual City hneh se Villa hi UCL khel turin an la tling chiang dawn bik lo. City lakah Spurs an tlawm vangin Villa hian an tum ram an thleng a, top 4 huang luah chungin season an khar dawn.
EPL club hlun Aston Villa hian European competition an khelh hnuhnun ber tum chu kum 1982-83 kha a ni. Khatih hun lai khan European Cup tih thin a ni a. Kum 1991-92 atangin European Cup hi Champions League tiin a hming thlak a ni. Champions League tia a hming thlak a nih hnuin Aston Villa hian inelna an hmachhawn phak lo ta ngar ngar a. Emery hnuaiah ropui taka an inlan hnuin Europe a football club te inelna ngaihhlut hlawh berah an inlan ve leh dawn ta a ni.
Tottenham leh Manchester City te an inkhelh lai khan Aston Villa hian Villa Park-ah clun annual awards an lo sem ve mek a. Tottenham an tlawm a, UCL an khel phak dawn tih a chian hnuin ropui takin an lawm zui a, an thawm pawh a tha hle.
UCL khel tura a Villa a hruai thlen hnuin manager Unai Emery chuan, “Vawiin hi kan tan ni chhinchhiahthlak bik a ni. UCL khelh phak hi kan tum a ni a, season bul kan tan phat khan kan tum ram chu hei ngei hi a ni. Hliamin min tihbuai chang awm bawk mah se eng lai pawhin kan tum ram thlengin tumin kan insawr bing a, he hmun hi kan pan tlat thin. UCL khelh phak hi kan tan chuan thil tha ber a ni”, tiin social media lamah a lawmna luang liam a tarlang.
Aston Villa defender defender Lucas Digne pawh in, “UCL kan khelh phak hi tuman an ring ngai lo. Kan tih theih kan hria a, kei ni erawh chuan kan beisei tlat thung”, tiin an tum ram an thlen tak thu a sawi ve bawk.
Villa in champions League an khelh theih nan manager Unai Emery a thlawhhlawk viau a, fak loh theih a ni lo. October 2022 a Villa a enkawl tirh khan 14-naah an awm mek. Emery hnuaiah hma an sawn uak uak a, UCL an khel phak ta hial. Emery an rawih hnuah Villa hi EPL-ah Manchester City, Liverpool leh Arsenal te chiah point hmuh tam lamah an tluk lo. Emery hian Valencia, Spartak Moscow, Sevilla, Paris St-Germain leh Villarreal te Champions League a lo khelhpui tawh a, tunah Aston Villa. Manager tha a nihzia chiang zawkin a pho lang a ni ber mai.