May 14, Thawhleh zan khan English Premier League (EPL) ah inkhel hmuhnawm tak a awm a. Champions League khelh phak la beisei Tottenham in champion tum Manchester City an mikhual. Tottenham muala inkhel hi Arsenal leh Aston Villa ten an ngaihven hle. City chak lo se Arsenal tan champion theihna hun tha zawk a inhawng dawn a, Spurs chak lo se Aston Villa chu Champions League khel turin an tling ve dawn thung. Tottenham lak ah an chak vangin Manchester City in champion an hnaih a, an kuta trophy awm mek an thlauh leh thlauh loh chu an kut zal liau liau a innghat a ni tawh.
Tottenham muala inkhel ngaihven hlawh takah hian mualneitu Tottenham in bul an tan tha a, champion lai Manchester City an zim tawt zung zung a, hmunawl an pe duh lo. An taimak em vangin City an dang chat a, hlauhawm siam tam thei lovin an siam. Tottenham tlarhnung inrem phui tak karah hian team tha City in goal hlauhawm an nei zauh zauh a, Phil Foden chuan uiawm takin hun tha a hloh a, an mamawh goal erawh an thun thei lo. Spurs pawhin goal thun theihna hun tha an nei a, Ederson an pal tlang thei bik lova, goal awm lovin chawlhlawk an hmang.
Chawlhlawk hnu lamah inkhel a hmuhnawm zui viau a, team tha zawk City in goal an thun ta nge nge. City hian Spurs tlarhnung chet fuh tawk loh vangin an khingpuite an nawr tlang. Midfielder ropui Kevin de Bruyne chuan fuh taka a khalh tlang hnuin Erling Haaland tan tha zetin a chhawksap. Haaland hian penalty chhunga ball a tawh hmasak ber 51-naah awlsam zetin a pet goal a, hmahruaina goal a thun.
City in hmahruaina goal an thun chiah hian Arsenal hmelma kum hlun Tottenham tantute an che ngei awm hle a. Haaland goal thun hi ‘in lo hmu em?’ tia zaiin Arsenal tantute an tihel. He thil thleng hi Tottenham manager Ange Postecoglou ngei pawhin mak a ti hle a, an club tantute khawsatzia chu a duh loh tak zet thu a sawichhuak zui ta hial a, an ngaihdan a inpersan hle.
Si an phurh hnuin Tottenham in goal thun theihna hun tha zet mai vawi hnih an nei a, uiawm takin an hlah ve ve. Spurs in an si phurh an sut theih loh lai hian Jeremy Doku chuan penalty a hlawhchhuak. He penalty hi Haaland chuan minute 90+1-ah a pet goal a, an chakna a nem nghet. Haaland goal hnih hmangi City hian hnehna an chang a, champion an hnaih leh zual. An khelh hnuhnung berah City hian an mikhual West Ham an hneh a nih chuan a vawi li nan EPL-ah an champion ang a, record thar an siam ang.