English Premier League (EPL) club te chuan June ni 6, 2024 hian annual general meeting an nei dawn a, he meeting ah EPL a Video Assistant Referee (VAR) hman chhunzawm zel leh zel loh chungchang an ngaihtuah tha dawn.
VAR chungchang sawiho tur hi Crystal Palace in an thehluh a ni a. Kum 2019 atanga hman tan VAR hi hmang chhunzawm lo tur chuan meeting naa kal hmun thuma thena hmun hnih talin hman chhunzawm an duh loh a ngai dawn a. Hmun thumna thena hmun hnih tling tur chuan club 14 tal a ngai dawn tihna a ni.
Hetihlai hian Premier League thuneitute chuan VAR sawiselna lian tak awm an hriat thu an sawi a. Sawiselna nasa tak karah Referee puitu tha tak ni turin VAR hman chhunzawm zel hi 100% a an thlawp thu an sawi tel bawk.
VAR hi referee ten thutlukna dik an siam theih nana puitu tha tak a ni a. Thil dik leh felfai zawk beiseina nen rinna nghat chungin 2019 atangin EPL-ah hian hman tan a ni. Beisena sang tak nen hman tan ni bawk mah se tihsual lian tak tak an nei ve ta fo va, thutlukna siamtu chu mihring tho an nih bawk vangin tih dik tawk loh an nei nual. Heng tihsual hrang hrangte hian VAR hman kher a ngai lo tih ngaihdan lian tak a pianchhuahtir a, season thar atangin VAR hman chhunzawm lo tura rawtna a awm ta hial a ni.
EPL club te hian 2024-25 season atangin semi-automated offside technology hman an lo remti tawh a. Hei hian offside chungchangah thutlukna dik siam turin a pui hle tura ngaih a ni. Tarlan tawh angin EPL a dan hmek mek tidanglam tur chuan club 20 zinga club 14 talin an pawmpui a ngai.