Nimin khân Mizoram EIACP Hub, Mizoram Pollution Control Board (MPCB) chuan International Day for Biological Diversity, 2024 pualin Reiek Tlangah Govt. Reiek Higher Secondary School leh Govt. Ailawng High School zirlai naupang leh zirtirtute nen hun hmangin mi 80 vel an tel.
He International Day for Biological Diversity, 2024 lawmna hun hmanpuitu Liankima Lailung, IFS (Rtd.), Chairman, Mizoram Pollution Control Board chuan thusawiin programmme hmang tura tel zawng zawngte hnenah lawmthu a sawi bakah zirlaite chu biological hotspot huam chhunga an awm thei chu an vanneih thu leh ngaihhlut nachâng hre turin a fuih a, tin, khawvel hmun danga la hmuh ngai loh Reiek-a an hmuhchhuah species a awm thu sawiin a hming atan Aeschynanthus reiekensis vuah a nih thu a hrilh bawk.
He programme puala resource person atana sawm M. Sawmliana, MFS (Rtd.) chuan Reiek leh Ailawng khuate chu plant biodiversity lama hausa tak a nih thu leh a bik takin nauban leh hnim chi hrang hrang khawvel hmun danga an hmuh ngai lohte pawh a awm nual thu sawiin ramngâw leh hnimte pawh tichereu mai loa humhalh a pawimawhzia a zirtir bawk a ni. He huna tel zawng zawngte hian Mission LiFE ‘Thutiam’- Environment humhim tur leh chumi atana nunphung thlak danglam ngaite pawh thlak danglam turin an chham a ni.
Programme an hman zawh hnu hian khawvel ram danga species vâng tak Globba wengiri leh Globba radicalis (Aithîng)-te chu Reiek tlangah hian phunin tlâng leh a chhehvêla hman khat daih plastic bawlhhlawh an paihte chhar faiin hun an hmang nghal bawk.